ព័ត៌មានអន្ដរជាតិ

លោកត្រាំ គំរាមគុយបា ថា អាចជាគោលដៅបន្ទាប់ ក្រោយបញ្ចប់នៅអ៊ីរ៉ង់

បានផុស

៥ ខែ មុន

នៅ

ថ្ងៃសុក្រ ៦ មីនា ២០២៦

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បន្តគំរាមកំហែង ផ្តួលរំលំរដ្ឋាភិបាលគុយបា ដោយបញ្ជាក់ថាសកម្មភាពយោធារបស់សហរដ្ឋអាមេរិកនៅប្រទេសនោះអាចកើតឡើង បន្ទាប់ពីរដ្ឋបាលរបស់លោកបានបញ្ចប់ការវាយប្រហារប្រឆាំងនឹងអ៊ីរ៉ង់។

ថ្លែងនៅឯសេតវិមានកាលពីថ្ងៃព្រហស្បតិ៍ អំឡុងពេលទស្សនកិច្ចរបស់ក្រុមបាល់ទាត់ Inter Miami ប្រធានាធិបតី ត្រាំ បានអរគុណដល់រដ្ឋមន្ត្រីការបរទេសអាមេរិក លោក Marco Rubio ក្នុងការចាត់ចែងការងារដ៏អស្ចារ្យលើប្រទេសគុយបា។ នេះបើតាមការចេញផ្សាយរបស់ Al Jazeera នៅថ្ងៃទី០៥ ខែមីនា ឆ្នាំ២០២៦។

ប្រធានាធិបតីសហរដ្ឋអាមេរិក លោក ដូណាល់ ត្រាំ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា៖ «អ្វីដែលកំពុងកើតឡើងលើប្រទេសគុយបា គឺអស្ចារ្យណាស់។ ហើយយើងគិតថា យើងចង់បញ្ចប់រឿងនេះ [អ៊ីរ៉ង់] ជាមុនសិន។ ប៉ុន្តែអ្វីដែលជាបញ្ហា វានៅត្រង់ពេលវេលាប៉ុណ្ណោះ»។

លោក ត្រាំនិងសម្ព័ន្ធមិត្តតែងតែគំរាមកំហែងទីក្រុងហាវ៉ាណា (Havana) ដោយបង្កើនសម្ពាធផ្នែកសេដ្ឋកិច្ច ក្នុងគោលបំណងផ្តួលរំលំរដ្ឋាភិបាលកុម្មុយនីស្តរបស់ប្រទេសនេះ។

បន្ទាប់ពីសហរដ្ឋអាមេរិកបានចាប់ខ្លួនប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) កាលពីខែមករា លោក ត្រាំ លើកឡើងថា ការផ្គត់ផ្គង់ប្រេងរបស់ប្រទេសនេះ ទៅកាន់ប្រទេសគុយបា ដែលជាខ្សែជីវិតសេដ្ឋកិច្ចដ៏សំខាន់សម្រាប់កោះនេះ ស្ថិតនៅក្រោមទណ្ឌកម្មយ៉ាងធ្ងន់ធ្ងររបស់សហរដ្ឋអាមេរិកអស់រយៈពេលជាច្រើនឆ្នាំ នឹងត្រូវកាត់ផ្តាច់ទាំងស្រុង។

រដ្ឋាបាលលោក ត្រាំ បានបណ្តុះបណ្តាលកម្លាំងយោធាដ៏លើសលប់ ដើម្បីជំរុញអាទិភាពអាមេរិកនៅជុំវិញពិភពលោក រួមទាំងនៅអាមេរិកឡាទីនផងដែរ។

លោកធ្លាប់និយាយថា៖ «មើលទៅប្រទេសគុយបាត្រៀមខ្លួនរួចហើយ ក្នុងការដួលរលំនាពេលអនាគតដ៏ខ្លីខាងមុខនេះ»។

លោកលើកឡើងពីការអន្តរាគមន៍យោធារបស់សហរដ្ឋអាមេរិកនៅជុំវិញពិភពលោកថា៖ « យើងទទួលបានជោគជ័យយ៉ាងខ្លាំងតាមវិធីផ្សេងៗគ្នាជាច្រើន។ ខ្ញុំបានបង្កើតយោធា និងកសាងពួកគេឡើងវិញ នៅក្នុងអាណត្តិដំបូងរបស់ខ្ញុំ។ យើងកំពុងប្រើប្រាស់ច្រើនជាងអ្វីដែលខ្ញុំចង់ប្រើប្រាស់! នៅពេលយើងចាប់ផ្តើមប្រើប្រាស់ យើងបានរកឃើញថាវាពិតជាដំណើរការល្អមែន»។

លោកបន្ថែមថា៖ « ពេលយើងក្រឡេកមើលប្រទេសវ៉េណេស៊ុយអេឡា ហើយក្រឡេកមើល Midnight Hammer (ប្រតិបត្តិការយោធាដែលបើកការវាយប្រហារយ៉ាងច្បាស់លាស់ប្រឆាំងនឹងនុយក្លេអ៊ែរ)ក្នុងប្រទេសអ៊ីរ៉ង់ វាបានកំណត់ឈុតឆាកយ៉ាងល្អសម្រាប់យើងដែលកំពុងធ្វើនៅពេលនេះ វាពិតជាអស្ចារ្យណាស់»៕

ប្រែសម្រួល៖ ណឺ មិនា