ព័ត៌មានអន្ដរជាតិ

សារព័ត៌មានអាមេរិក៖ រុស្ស៊ីនៅពីក្រោយអ៊ីរ៉ង់ក្នុងប្រយុទ្ធសងសឹកអាមេរិក-អ៊ីស្រាអែល

បានផុស

៤ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

មន្ត្រីចារកម្មលោកខាងលិចម្នាក់ឱ្យដឹងថា រុស្ស៊ីកំពុងជួយអ៊ីរ៉ង់ជាមួយយុទ្ធសាស្ត្រដ្រូនទំនើបៗពីសង្គ្រាមរបស់ខ្លួនលើប្រទេសអ៊ុយក្រែន ដើម្បីវាយប្រហារគោលដៅរបស់សហរដ្ឋអាមេរិក និងក្នុងប្រទេសឈូងសមុទ្រនៅមជ្ឈិមបូព៌ា។

សារព័ត៌មាន CNN ដែលមានមូលដ្ឋាននៅសហរដ្ឋអាមេរិក បានផ្សាយថ្ងៃទី១១ខែមីនា ឆ្នាំ២០២៦ ឲ្យដឹងថា ដ្រូនម៉ាក Shahed រចនាដោយអ៊ីរ៉ង់ ប៉ុន្តែត្រូវបានផលិតដោយទីក្រុងមូស្គូប្រើប្រាស់ដើម្បីប្រយុទ្ធជាអ៊ុយក្រែន ទទួលបានជោគជ័យមិននឹកស្មានដល់ក្នុងការជ្រៀតចូលតាមប្រព័ន្ធការពារដែនអាកាសរបស់បណ្តាប្រទេសឈូងសមុទ្រ។

ប្រធានាធិបតីរុស្ស៊ី លោក Vladimir Putin! រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមមន្រ្តីខាងលើ រុស្ស៊ីនិងអ៊ីរ៉ង់មានទំនាក់ទំនងជាមួយគ្នាទាំងផ្នែកយុទ្ធសាស្រ្តសង្រ្គាម មកដល់ពេលនេះរុស្ស៊ីផ្តល់ជំនួយទូទៅ ដូចជាការកំណត់គោលដៅរបស់សត្រូវ ប៉ុន្តែដំបូន្មានយុទ្ធសាស្ត្រជាក់លាក់គឺជាកម្រិតនៃការគាំទ្រថ្មីមួយរវាងប្រទេសទាំងពីរ។

មន្រ្តីសុំមិនបញ្ចេញឈ្មោះថា៖ «អ្វីដែលធ្លាប់តែជាការគាំទ្រទូទៅ ឥឡូវនេះវាកាន់តែគួរឱ្យព្រួយបារម្ភ រួមទាំងយុទ្ធសាស្ត្រកំណត់គោលដៅដ្រូន UAS ដែលរុស្ស៊ីបានប្រើប្រាស់នៅអ៊ុយក្រែន»។

ខណៈមន្ត្រីរូបនេះបដិសេធមិនបញ្ជាក់ពីជំនួយយុទ្ធសាស្ត្រពិតប្រាកដរបស់រុស្ស៊ីប្រើប្រាស់យន្តហោះគ្មានមនុស្សបើក (ដ្រូន) ម៉ាក Shahed ប្រឆាំងនឹងអ៊ុយក្រែនទេ។

ចំណែក ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី (Volodymyr Zelensky) បង្ហោះលើបណ្តាញសង្គម X កាលពីថ្ងៃពុធថា៖ «រុស្ស៊ីបានចាប់ផ្តើមគាំទ្ររបបអ៊ីរ៉ង់ដោយដ្រូន។ ពួកគេពិតជានឹងជួយជាមីស៊ីល ហើយក៏កំពុងជួយជាមួយនឹងសម្ភារៈការពារដែនអាកាសផងដែរ»។

គួរបញ្ជាក់ថាទីក្រុងកៀវបានបញ្ជូនអ្នកជំនាញស្ទាក់ចាប់ដ្រូនទៅកាន់តំបន់ឈូងសមុទ្រក្នុងការបញ្ឈប់សកម្មភាពដ្រូនម៉ាក Shaheds ។

មិនតែប៉ុណ្ណោះមន្ត្រីរូបនោះបង្ហាញការព្រួយបារម្ភកាន់តែខ្លាំង ពីការគំរាមកំហែងក្នុងឈូងសមុទ្រ ជាពិសេសការប្រើប្រាស់មីនរបស់អ៊ីរ៉ង់នៅក្នុងច្រកសមុទ្រ Hormuz ក៏ដូចជាការវាយប្រហារដោយដ្រូននិងបច្ចេកវិទ្យាដោយប្រើទូកនេសាទ Dhow មកលើក្រុមនាវាផ្ទុកយន្តហោះអាមេរិកផងដែរ៕

ប្រែសម្រួល៖ ណឺ មិនា