ព័ត៌មានអន្ដរជាតិ

កាតា៖ ការមិនធ្វើសកម្មភាពអ្វីសោះរបស់ UN ជាសញ្ញាគ្រោះថ្នាក់ខ្លាំងនៅជម្ឈិមបូព៌ា

បានផុស

២ ខែ មុន

នៅ

ថ្ងៃព្រហស្បតិ៍ ១២ មីនា ២០២៦

ដោយ

ប្រទេសកាតាបានអំពាវនាវដល់ក្រុមប្រឹក្សាសន្តិសុខអង្គការសហប្រជាជាតិ (UNSC) ចាត់វិធានការជាបន្ទាន់ ដើម្បីបញ្ឈប់ ការវាយប្រហាររបស់អ៊ីរ៉ង់លើប្រទេសនានានៅទូទាំងមជ្ឈិមបូព៌ា ដោយព្រមានថា ការមិនធ្វើសកម្មភាពអ្វីសោះនឹងនាំមកនូវសញ្ញាគ្រោះថ្នាក់ជាក់ជាមិនខាន។

លោកស្រី Sheikha Alya Ahmed bin Saif Al Thani ឯកអគ្គរដ្ឋទូតកាតាប្រចាំអង្គការសហប្រជាជាតិ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Al Jazeera ផ្សាយថ្ងៃទី១១ ខែមីនា ឆ្នាំ២០២៦ លោកស្រី Sheikha Alya Ahmed bin Saif Al Thani ឯកអគ្គរដ្ឋទូតប្រទេសកាតាប្រចាំអង្គការសហប្រជាជាតិ កាលពីថ្ងៃពុធ បានថ្កោលទោសការវាយប្រហារដោយមីស៊ីល និងយន្តហោះគ្មានមនុស្សបើក(ដ្រូន) របស់អ៊ីរ៉ង់ ទៅលើគោលដៅនានានៅទូទាំងតំបន់ថា ជាការរំលោភបំពានយ៉ាងច្បាស់លើច្បាប់អន្តរជាតិ និងធម្មនុញ្ញអង្គការសហប្រជាជាតិ។

លោកស្រីប្រាប់អ្នកយកព័ត៌មានទីស្នាក់ការកណ្តាលអង្គការសហប្រជាជាតិនៅទីក្រុងញូវយ៉កថា៖ « ការបន្តកំណត់គោលដៅមកលើទឹកដីរបស់យើង គឺសាធារណរដ្ឋអ៊ីរ៉ង់មិនបានឆ្លុះបញ្ចាំងពីសុច្ឆន្ទៈល្អនោះទេ ហើយវាប៉ះពាល់យ៉ាងខ្លាំងដល់មូលដ្ឋានគ្រឹះនៃទំនាក់ទំនងទ្វេភាគីរវាងប្រទេសយើងដែលជាអ្នកបង្កើតឡើង»។

លោកស្រីបន្តថា៖ «ក្រុមប្រឹក្សាសន្តិសុខត្រូវតែធ្វើសកម្មភាព [និង] បំពេញការទទួលខុសត្រូវរបស់ខ្លួនជាបន្ទាន់។ ការខកខានមិនឆ្លើយតបនឹងបញ្ជូនសញ្ញាគ្រោះថ្នាក់មួយ ថាការវាយប្រហារប្រឆាំងនឹងប្រទេសជិតខាងដែលមិនពាក់ព័ន្ធ(នឹងភាគីជម្លោះ) មិនមានផលវិបាកទេ»។

ការអត្ថាធិប្បាយរបស់លោកស្រីធ្វើឡើងភ្លាមៗមុនពេលក្រុមប្រឹក្សាសន្តិសុខបោះឆ្នោតគាំទ្រសេចក្តីព្រាងលើសេចក្តីសម្រេចមួយ ដែលថ្កោលទោសរលកនៃការវាយប្រហាររបស់អ៊ីរ៉ង់លើប្រទេសក្រុមប្រឹក្សាសហប្រតិបត្តិការឈូងសមុទ្រ (GCC)។

គួរបញ្ជាក់ថាមនុស្សយ៉ាងហោចណាស់ ១ ២៥៥នាក់ ត្រូវបានស្លាប់នៅក្នុងការវាយប្រហាររបស់សហរដ្ឋអាមេរិក និងអ៊ីស្រាអែលលើប្រទេសអ៊ីរ៉ង់។

មិនតែប៉ុណ្ណោះ ចំនួនអ្នកស្លាប់បានកើនឡើងបង្កឱ្យមានការព្រួយបារម្ភពីអន្តរជាតិ និងការអំពាវនាវឱ្យមានការបន្ធូរបន្ថយភាពតានតឹង ប៉ុន្តែមកដល់ពេលនេះសង្គ្រាមមិនទាន់បង្ហាញសញ្ញាថាមានការថមថយនៅឡើយទេ៕

ប្រែសម្រួល៖ ណឺ មិនា