កូរ៉េខាងជើង​បាញ់​មីស៊ី​​​បាលិស្ទិក​១០គ្រាប់​ កំញើញ​សមយុទ្ធ​កូរ៉េខាងត្បូង​និង​អាមេរិក​

​កូរ៉េខាងជើងបានបាញ់មីស៊ីលផ្លោង​រយៈចម្ងាយឆ្នាយ «បាលិស្ទិក (ballistic)» ប្រមាណ​​១០គ្រាប់ឆ្ពោះទៅសមុទ្រខាងកើត នៅថ្ងៃសៅរ៍ ដែល​អគ្គសេនាធិការចម្រុះ (JCS)​ កូរ៉េខាងត្បូង​​ បាននិយាយថា ជាការបង្ហាញពីសាច់ដុំ ខណៈដែលកូរ៉េខាងត្បូង និងសហរដ្ឋអាមេរិកកំពុងធ្វើសមយុទ្ធយោធានិទាឃរដូវដ៏សំខាន់របស់ពួកគេ។ យោង​សារព័ត៌មាន Yonhap​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ JCS បាន​ឲ្យដឹង​ថា​​ យោធា​កូរ៉េខាងត្បូង​​បានរកឃើញមីស៊ីលដែលបាញ់ចេញពីតំបន់ Sunan នៅភាគខាងជើងនៅម៉ោងប្រហែល ១:២០ រសៀល។ វាជាការបាញ់មីស៊ីលផ្លោងលើកទីបីរបស់កូរ៉េខាងជើងនៅឆ្នាំនេះ។

JCS បាននិយាយថា មីស៊ីលទាំងនោះបានហោះប្រហែល ៣៥០ គីឡូម៉ែត្រ ដោយបន្ថែមថា ការវិភាគបន្ថែមកំពុងដំណើរការ។

JCS បានបន្ថែមថា៖​«ក្រោមឥរិយាបថការពាររួមគ្នាដ៏រឹងមាំរវាងកូរ៉េខាងត្បូង និងសហរដ្ឋអាមេរិក យោធារបស់យើងកំពុងតាមដានយ៉ាងដិតដល់នូវការ​វិវត្តន៍​ផ្សេងៗរបស់កូរ៉េខាងជើង ហើយរក្សាសមត្ថភាព និងឥរិយាបថដែលអាចឆ្លើយតបយ៉ាង​ខ្លាំងចំពោះការញុះញង់ណាមួយ»។

ការបាញ់បង្ហោះចុងក្រោយបំផុតនេះ បានកើតឡើង នៅពេលដែលកូរ៉េខាងត្បូង និងសហរដ្ឋអាមេរិកបានចាប់ផ្តើមសមយុទ្ធ Freedom Shield ប្រចាំឆ្នាំរបស់ពួកគេនៅថ្ងៃចន្ទ សម្រាប់រយៈពេល១១ថ្ងៃ។

កូរ៉េខាងជើងបានថ្កោលទោស​ចំពោះ​ការ​ធ្វើ​សមយុទ្ធយោធារួមគ្នារបស់សម្ព័ន្ធមិត្តជាយូរមកហើយថា ជាការហាត់សមសម្រាប់ការឈ្លានពាន ទោះបីជាទីក្រុងសេអ៊ូល និងទីក្រុងវ៉ាស៊ីនតោនបាននិយាយថា សមយុទ្ធទាំងនេះគឺត្រឹមតែ​ការពារខ្លួន​ប៉ុណ្ណោះ​ក៏ដោយ​​។

កាលពីដើមសប្តាហ៍នេះ លោកស្រី Kim Yo-jong ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក Kim Jong-un បានថ្កោលទោសសមយុទ្ធយោធាដែលកំពុងបន្ត ហើយបានព្រមានអំពី «ផលវិបាកដ៏គួរឱ្យភ័យខ្លាចដែលមិនអាចនឹកស្មានដល់»​។

កូរ៉េខាងជើងក៏បានសាកល្បងមីស៊ីលយុទ្ធសាស្ត្រពីនាវាពិឃាត Choe Hyon ​ក្នុង​ប៉ុន្មានថ្ងៃ​មុន​នេះ ដោយមេដឹកនាំកូរ៉េខាងជើងបានគូសបញ្ជាក់ពីតម្រូវការក្នុងការរក្សា និងពង្រីក «ប្រព័ន្ធទប់ស្កាត់សង្គ្រាមនុយក្លេអ៊ែរដ៏មានឥទ្ធិពល និងអាចទុកចិត្តបាន»​។ នេះបើយោងតាមប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាង។

ការបាញ់មីស៊ីលចុងក្រោយរបស់កូរ៉េខាងជើងក៏បានកើតឡើងបន្ទាប់ពីនាយករដ្ឋមន្ត្រី Kim Min-seok បាននិយាយថា ប្រធានាធិបតីសហរដ្ឋអាមេរិក Donald Trump នៅតែមានភាពវិជ្ជមានអំពីការបន្តការសន្ទនាជាមួយមេដឹកនាំកូរ៉េខាងជើង ខណៈពេលដែលទុកពេលវេលាឱ្យបើកចំហ។

ការកត់សម្គាល់របស់នាយករដ្ឋមន្ត្រីបានកើតឡើងចំពេលមានការរំពឹងទុកថា លោក ត្រាំ អាចស្វែងរកការជួបជាមួយ​មេដឹកនាំ​កូរ៉េខាងជើង​​​ក្នុងអំឡុងពេលដំណើរទស្សនកិច្ចរបស់លោកទៅកាន់ប្រទេសចិនសម្រាប់កិច្ចប្រជុំកំពូលជាមួយប្រធានាធិបតីចិន លោក ស៊ី ជីនពីង (Xi Jinping)។ លោក ត្រាំ​ ត្រូវបានគេរាយការណ៍ថា មានគម្រោងធ្វើដំណើរទៅកាន់ប្រទេសចិនចាប់ពីចុងខែមីនាដល់ដើមខែមេសា៕​

សម្រូល​ រ៉ាន់ រើយ​