​ម៉ាក្រុង ​ប្រាប់​ អ៊ីរ៉ង់ឲ្យបញ្ឈប់ការវាយប្រហារប្រទេស​នានា និង​ថា​ អ៊ីរ៉ង់​មិនត្រូវ​មាននុយក្លេអ៊ែរទេ​

ប្រធានាធិបតីបារាំង លោក ​អេម៉ានូអែល ម៉ាក្រុង​ (Emmanuel Macron) បាននិយាយកាលពីថ្ងៃអាទិត្យទី១៥មីនា ថា លោក​បានស្នើសុំឲ្យប្រធានាធិបតីអ៊ីរ៉ង់ លោក​ Masoud Pezeshkian បញ្ឈប់ការវាយប្រហារជាបន្ទាន់ ប្រឆាំងនឹងប្រទេសនានានៅ​​​តំបន់ឈូង​សមុទ្រ​​ក្នុង​មជ្ឈិម​បូព៌ា ​ទោះ​វាយ​ប្រហារ​ដោយផ្ទាល់ ឬតាមរយៈ​ក្រុម​សកម្ម​ប្រយុទ្ធ​​នៅលីបង់ និងអ៊ីរ៉ាក់​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយ​​របស់​​ Reuters លោក Macron បាននិយាយនៅក្នុងសារមួយនៅលើ​បណ្តាញ​សង្គម​ X ថា៖​«ខ្ញុំបានទូរស័ព្ទទៅប្រធានាធិបតីអ៊ីរ៉ង់ Masoud Pezeshkian ដោយបានរំលឹកគាត់ថា ប្រទេសបារាំងកំពុងធ្វើសកម្មភាពក្នុងក្របខ័ណ្ឌការពារយ៉ាងតឹងរ៉ឹង ដែលមានគោលបំណងការពារផលប្រយោជន៍របស់ខ្លួន ដៃគូក្នុងតំបន់ និងសេរីភាពនាវាចរណ៍ ហើយវាមិនអាចទទួលយកបានទេសម្រាប់ប្រទេសរបស់យើងក្នុងការក្លាយជាគោលដៅ»។

នៅក្នុងនោះផងដែរ លោកក៏បានសង្កត់ធ្ងន់លើតម្រូវការសម្រាប់សេរីភាពនាវាចរណ៍នៅក្នុងច្រកសមុទ្រ Hormuz ត្រូវតែស្ដារឡើងវិញឲ្យបានឆាប់តាមដែលអាចធ្វើទៅបាន។

លោក​​ម៉ាក្រុង​ បានលើកឡើងបន្ថែមថា៖«មានតែក្របខ័ណ្ឌនយោបាយ និងសន្តិសុខថ្មីមួយប៉ុណ្ណោះ ដែលអាចធានាបាននូវ​សន្តិភាព និងសន្តិសុខសម្រាប់ទាំងអស់គ្នា។ ការរៀបចំបែបនេះត្រូវតែធានាថា អ៊ីរ៉ង់មិន​មាន​អាវុធនុយក្លេអ៊ែរឡើយ»​។

ការហៅទូរស័ព្ទរវាងមេដឹកនាំទាំងពីរបានកើតឡើងប៉ុន្មានថ្ងៃ បន្ទាប់ពីបារាំងបានប្រកាសថា ទាហាន​របស់ខ្លួន​ម្នាក់ត្រូវបានសម្លាប់ និង៦នាក់រងរបួសនៅក្នុងការវាយប្រហារដោយយន្តហោះគ្មានមនុស្សបើក (UAV) លើតំបន់ស្វយ័ត Kurdistan របស់អ៊ីរ៉ាក់ កាលពីថ្ងៃទី ១៣ខែមីនា។ ទាំងនេះគឺជាការស្លាប់ និងរបួសដំបូងនៃកងទ័ពបារាំង ចាប់តាំងពីការផ្ទុះឡើងនៃជម្លោះមជ្ឈិមបូព៌ានៅចុងខែកុម្ភៈ៕

អត្ថបទ៖ សាង ស្រីល័ក្ខ