ប្រធាន IAEA៖ «ការប្រើកម្លាំងបាយ មិនអាចកម្ចាត់កម្មវិធីនុយក្លេអ៊ែរអ៊ីរ៉ង់ឲ្យអស់នោះទេ»

ក្នុងខណៈដែលការវាយប្រហារតាមអាកាសរវាងអាមេរិក អ៊ីស្រាអែល និងអ៊ីរ៉ង់ កំពុងតែបន្តយ៉ាងក្ដៅគគុក លោក Rafael Grossi ដែលជាមេដឹកនាំទីភ្នាក់ងារថាមពលបរមាណូអន្តរជាតិ (IAEA) បានចេញមុខមកព្រមានចំៗថា ការប្រើកម្លាំងបាយតែមួយមុខ គឺមិនអាចកម្ចាត់កម្មវិធីនុយក្លេអ៊ែររបស់អ៊ីរ៉ង់ឲ្យអស់ពីឫសគល់បានឡើយ។

តាម​ការ​ផ្សាយ​របស់ Fox News ចុះ​ថ្ងៃទី​១៩​ខែ​មីនា​ឆ្នាំ​២០២៦ លោក Grossi បានពន្យល់ប្រាប់អ្នកសារព័ត៌មានថា ដ្បិត​មានការបំផ្លិចបំផ្លាញយ៉ាងណាក៏ដោយ ក៏បណ្តាញហេដ្ឋារចនាសម្ព័ន្ធដ៏ខ្វាត់ខ្វែង និងចំណេះដឹងបច្ចេកទេសដ៏ជ្រៅជ្រះរបស់អ៊ីរ៉ង់ នៅតែជារឿងពិតដែលមិនអាចបដិសេធបាន។ លោកសង្កត់ធ្ងន់ថា នៅពេលដែលផ្សែងកាំភ្លើងរលាយបាត់ទៅ សារធាតុវិទ្យុសកម្ម និងសមត្ថភាពនៃការចម្រាញ់អ៊ុយរ៉ាញ៉ូមរបស់អ៊ីរ៉ង់ នឹងនៅតែមានវត្តមានដដែល ដែលវានឹងធ្វើ​ឲ្យ​ពិភពលោកគ្មានជម្រើសអ្វីក្រៅពីការវិលត្រឡប់ទៅរកតុចរចា​វិញ​នោះទេ។

មូលហេតុដែលធ្វើ​ឲ្យ​អ្នកជំនាញមានការព្រួយបារម្ភខ្លាំង គឺដោយសារតែឃ្លាំងផ្ទុកសារធាតុអ៊ុយរ៉ាញ៉ូមចម្រាញ់ភាគច្រើនរបស់អ៊ីរ៉ង់ ត្រូវបានគេជឿថាបានរក្សាទុកយ៉ាងមានសុវត្ថិភាពនៅក្នុងរូងក្រោមដីដ៏ជ្រៅ នៅតំបន់ Isfahan និង Natanz។ ទីតាំងទាំងនេះមិនត្រឹមតែរឹងមាំ និងជ្រៅដែលពិបាកនឹងកម្ទេចតាមរយៈការទម្លាក់គ្រាប់បែកពីលើអាកាសប៉ុណ្ណោះទេ ប៉ុន្តែថែមទាំងមានភាពបត់បែនខ្ពស់ក្នុងការផ្លាស់ប្តូរទីតាំងទៀតផង។ លើសពីនេះទៅទៀត អ្វីដែលជាបញ្ហាប្រឈមធំបំផុតសម្រាប់សហគមន៍អន្តរជាតិនៅពេលនេះ គឺវត្តមាននៃទីតាំងក្រោមដីថ្មីមួយទៀតនៅជិតក្រុង Isfahan ដែលភ្នាក់ងារ IAEA មិនទាន់មានឱកាសចូលទៅត្រួតពិនិត្យនៅឡើយ។ កង្វះព័ត៌មាន និងការត្រួតពិនិត្យនេះ បានបង្កើតជាចន្លោះប្រហោងដ៏គ្រោះថ្នាក់មួយ ក្នុងខណៈដែលជម្លោះយោធាកំពុងតែបន្តរីករាលដាល៕

ប្រែសម្រួល៖ ឈាង