ព័ត៌មានអន្ដរជាតិ

អ៊ីរ៉ង់បានវាយប្រហារស្ថានីយឧស្ម័នធម្មជាតិរាវធំបំផុតរបស់ពិភពលោកនៅកាតា

បានផុស

៤ ខែ មុន

នៅ

ថ្ងៃព្រហស្បតិ៍ ១៩ មីនា ២០២៦

ដោយ

ក្រសួងមហាផ្ទៃកាតាឱ្យដឹងថា អ៊ីរ៉ង់បានវាយប្រហារស្ថានីយនាំចេញឧស្ម័នធម្មជាតិរាវ (LNG) ធំជាងគេបំផុតរបស់ពិភពលោកក្នុងប្រទេសកាតានៅថ្ងៃពុធ និងបង្កឱ្យមានអគ្គិភ័យឆាបឆេះយ៉ាងខ្លាំងនៅបរិវេណរោងចក្រ។ នេះបើយោងតាម Al Jazeera ផ្សាយកាលពីថ្ងៃទី១៨ ខែមីនា ឆ្នាំ២០២៦ ។

ក្រសួងមហាផ្ទៃកាតា បានលើកឡើងលើបណ្តាញសង្គម X ថា៖ «ក្រសួងមានសមត្ថកិច្ចកំពុងដោះស្រាយពីករណីអគ្គិភ័យក្នុងតំបន់ Ras Laffan បន្ទាប់ពីការវាយប្រហាររបស់អ៊ីរ៉ង់»។

យោងតាមកាសែត Financial Times ប្រហែលមួយភាគប្រាំនៃឧស្ម័នធម្មជាតិរាវរបស់ពិភពលោកត្រូវបានដឹកជញ្ជូនពីតំបន់ Ras Laffan។

រោងចក្រឧស្ម័នធម្មជាតិរាវ (LNG) របស់កាតា។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋកាតាបានថ្កោលទោសយ៉ាងខ្លាំង ចំពោះការវាយប្រហាររបស់អ៊ីរ៉ង់ដោយចេតនាដែលកំណត់គោលដៅលើទីក្រុងឧស្សាហកម្ម Ras Laffan បណ្តាលឱ្យមានអគ្គិភ័យ នាំឱ្យខូចខាតរោងចក្រយ៉ាងធ្ងន់ធ្ងរ។ ក្រសួងបន្តថា អគ្គិភ័យនៅទីតាំងនោះបានគ្រប់គ្រងជាបឋម ហើយមិនមានអ្នករងរបួសទេ។

ក្រុមហ៊ុន QatarEnergy ផលិតឧស្ម័នធម្មជាតិរាវ (LNG) ធំជាងគេបំផុតរបស់ពិភពលោកនិយាយថា៖ « បុគ្គលិកទាំងអស់មិនមាននរណាត្រូវរបួសទេ ក៏មិនមានអ្នកស្លាប់ដែរ»។

សេចក្តីប្រកាសមួយបានកើតឡើងប៉ុន្មានម៉ោង បន្ទាប់ពីអ៊ីរ៉ង់គំរាមវាយប្រហាររោងចក្រប្រេង និងឧស្ម័ននៅទូទាំងតំបន់ឈូងសមុទ្រ ដើម្បីសងសឹក ចំពោះការវាយប្រហាររបស់អ៊ីស្រាអែលលើវាលឧស្ម័ន South Pars របស់ទីក្រុងតេហេរ៉ង់ ខណៈផលវិបាកពីសង្គ្រាមសហរដ្ឋអាមេរិក-អ៊ីស្រាអែលលើអ៊ីរ៉ង់នៅតែបន្តកើនឡើង។

មិនតែប៉ុណ្ណោះក្រសួងនៃប្រទេសកាតាបានប្រកាសថា គ្រប់បុគ្គលិកស្ថានទូត ឬអ្នកផ្សេងទៀតដែលមានអត្តសញ្ញាណបណ្ណអ៊ីរ៉ង់ មិនត្រូវបានស្វាគមន៍ឱ្យបន្តរស់នៅនិងប្រកបការងារក្នុងប្រទេសកាតាទៀតឡើយ។

ក្រសួងបានទាមទារឱ្យពួកគេចាកចេញពីកាតាក្នុងរយៈពេល ២៤ម៉ោង ដោយបន្ថែមថាការសម្រេចចិត្តជាលទ្ធផលនៃការវាយប្រហារម្តងហើយម្តងទៀតរបស់អ៊ីរ៉ង់។

ក្រសួងបន្តថា៖ « កាតាចាត់ទុកការវាយប្រហារនេះជាការកើនឡើងដ៏គ្រោះថ្នាក់ ជាការរំលោភបំពានយ៉ាងធ្ងន់ធ្ងរលើអធិបតេយ្យភាព និងជាការគំរាមកំហែងដោយផ្ទាល់ដល់សន្តិសុខជាតិរបស់ប្រទេសកាតា»៕

ប្រែសម្រួល៖ ណឺ មិនា