Netanyahu ចេញមុខបដិសេធថា អ៊ីស្រាអែល អត់បានទាញអាមេរិក ឲ្យធ្លាក់ចូលក្នុងសង្គ្រាមអ៊ីរ៉ង់ទេ

ក្រោយមានពាក្យចចាមអារ៉ាមអំពីការស្លាប់ ពេលនេះនាយករដ្ឋមន្ត្រីអ៊ីស្រាអែល Benjamin Netanya​hu បានចេញមុខបញ្ជាក់យ៉ាងច្បាស់ថា ខ្លួននៅរស់ទេ ហើយក៏បដិសេធផងដែរ ចំពោះការចោទប្រកាន់ថា គឺអ៊ីស្រាអែល ដែលជាអ្នកអូសទាញអាមេរិក ឲ្យធ្លាក់ចូលក្នុងភ្នក់ភ្លើងសង្គ្រាមជាមួយអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាកាលពីថ្ងៃព្រហស្បតិ៍ទី១៩ខែមីនាឆ្នាំ២០២៦ លោក Netanyahu ថ្លែងថា៖ «តើអ្នកគិតថា អ្នកពិតជាអាចប្រាប់ឲ្យលោកត្រាំ ធ្វើអ្វីតាមអ្នកបានមែនទេ? យើងកំពុងចាត់វិធានការដើម្បីបំផ្លាញឧស្សាហកម្មទាំងឡាយណាដែលបង្កលក្ខណៈឲ្យមានការផលិតមីស៊ីល។ អ៊ីរ៉ង់លែងមានសមត្ថភាពចម្រាញ់អ៊ុយរ៉ាញ៉ូម និងផលិតមីស៊ីលបាលីស្ទីក បានទៀតហើយ។ យើងកំពុងឈ្នះ ហើយអ៊ីរ៉ង់កំពុងត្រូវបានបំផ្លាញយ៉ាងខ្ទេចខ្ទី»។

ស្របពេលជាមួយគ្នានោះ លោក Netanyahu ក៏បង្ហើបឲ្យដឹងផងដែរថា ប្រតិបត្តិការជើងគោក អាចជាផ្នែកមួយដ៏ចាំបាច់នៃសង្គ្រាមនេះ ហើយនោះជាអ្វីដែលលោកត្រាំ មិនចង់ឲ្យកើតឡើងនោះទេ។

ការអះអាងរបស់លោក Netanyahu កើតឡើងបន្ទាប់ពីមេដឹកនាំអាមេរិក ដូណាល់ ត្រាំ ប្រកាសថា អាមេរិកមិនជាប់ពាក់ព័ន្ធអ្វីក្នុងការវាយប្រហាររបស់អ៊ីស្រាអែលលើវាលឧស្ម័នអ៊ីរ៉ង់ South Pars ទេ។

លោក Trump បង្ហោះលើបណ្តាញសង្គម Truth Social កាលពីថ្ងៃពុធទី១៨ខែមីនាថា៖ «សហរដ្ឋអាមេរិកមិនដឹងអ្វីទាំងអស់អំពីការវាយប្រហារនោះ ហើយថែមទាំងមិនដែលគិតពីលទ្ធភាពនៃព្រឹត្តិការណ៍បែបនេះកើតឡើងទៀតផង។ វាគឺជាស្នាដៃរបស់អ៊ីស្រាអែល តែម្នាក់ប៉ុណ្ណោះ»៕

អត្ថបទ៖ សុខ សុវណ្ណ