ព័ត៌មានអន្ដរជាតិ

ពូទីនផ្ញើសារអបអរឆ្នាំថ្មីអ៊ីរ៉ង់ឲ្យឈ្នះសភាវៈអាក្រក់និងថា រុស្ស៊ីនៅតែជាមិត្ត«ដ៏ស្មោះត្រង់»

បានផុស

១ ខែ មុន

នៅ

ថ្ងៃសៅរ៍ ២១ មីនា ២០២៦

ដោយ

វិមានក្រឹមឡាំង បានឲ្យដឹងកាលពីថ្ងៃសៅរ៍ថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានអបអរសាទរដល់មេដឹកនាំអ៊ីរ៉ង់នៅថ្ងៃបុណ្យ Nowruz ដែលជាបុណ្យឆ្លាំថ្មីប្រពៃណីអ៊ីរ៉ង់ឬរបស់ពែក្សរ៍ ដោយបាននិយាយថា ទីក្រុងមូស្គូនៅតែជាមិត្តស្មោះត្រង់ និងជាដៃគូដែលអាចទុកចិត្តបានចំពោះទីក្រុងតេហេរ៉ង់។

ទោះជាយ៉ាងណាក៏ដោយ វិសាលភាពនៃការគាំទ្ររបស់ទីក្រុងមូស្គូចំពោះអ៊ីរ៉ង់កំពុងស្ថិតក្នុងការជជែកដេញដោលនិងគួរឲ្យសង្ស័យ។ ទីភ្នាក់ងារព័ត៌មានរ៉យទ័រ បានផ្សាយថា ប្រភពព័ត៌មានអ៊ីរ៉ង់មួយចំនួនបាននិយាយថា ពួកគេទទួលបានជំនួយពិតប្រាកដតិចតួចពីទីក្រុងមូស្គូនៅក្នុងវិបត្តិដ៏ធំបំផុតសម្រាប់អ៊ីរ៉ង់ចាប់តាំងពីស្តេច Shah ដែលគាំទ្រដោយសហរដ្ឋអាមេរិកត្រូវបានផ្តួលរំលំនៅក្នុងបដិវត្តន៍ឆ្នាំ១៩៧៩។

សារពីវិមានក្រឹមឡាំង បាននិយាយថា លោក ពូទីន បានផ្ញើការអបអរសាទរទៅកាន់មេដឹកនាំកំពូលអ៊ីរ៉ង់ លោក Ayatollah Mojtaba Khamenei និងប្រធានាធិបតីអ៊ីរ៉ង់ លោក Masoud Pezeshkian ក្នុងឱកាសឆ្នាំថ្មីរបស់់់អ៊ីរ៉ង់។

វិមានក្រឹមឡាំង បាននិយាយថា «លោក វ្ល៉ាឌីមៀរ ពូទីន បានជូនពរប្រជាជនអ៊ីរ៉ង់ឱ្យយកឈ្នះលើការកាត់ក្តីដ៏អាក្រក់ដោយសេចក្តីថ្លៃថ្នូរ ហើយបានសង្កត់ធ្ងន់ថា នៅក្នុងគ្រាលំបាកនេះ ទីក្រុងមូស្គូនៅតែជាមិត្តស្មោះត្រង់ និងជាដៃគូដែលអាចទុកចិត្តបានរបស់ទីក្រុងតេអេរ៉ង់»។

ប្រទេសរុស្ស៊ី បាននិយាយថា ការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់បានរុញច្រានមជ្ឈិមបូព៌ាទាំងមូលចូលទៅក្នុងទីជ្រៅបំផុត និងបង្កឱ្យមានវិបត្តិថាមពលសកលដ៏ធំមួយ ខណៈពេលដែលលោក ពូទីន បានថ្កោលទោសការសម្លាប់មេដឹកនាំកំពូលអ៊ីរ៉ង់ លោក Ayatollah Ali Khamenei ថាជាឃាតកម្ម «ដ៏ឃោរឃៅ»។

កាសែត Politico បានរាយការណ៍ថា ទីក្រុងមូស្គូបានស្នើផ្តល់អត្ថប្រយោជន៍ដល់ទីក្រុងវ៉ាស៊ីនតោន ដោយលើកឡើងថា វិមានក្រឹមឡាំងនឹងឈប់ចែករំលែកព័ត៌មានស៊ើបការណ៍សម្ងាត់ជាមួយអ៊ីរ៉ង់ ប្រសិនបើទីក្រុងវ៉ាស៊ីនតោនឈប់ផ្គត់ផ្គង់ព័ត៌មានស៊ើបការណ៍សម្ងាត់អំពីរុស្ស៊ីដល់អ៊ុយក្រែន ប៉ុន្តែសហរដ្ឋអាមេរិកបានបដិសេធគំនិតនេះ ហើយ ក្រោយមក វិមានក្រឹមឡាំងបានច្រានចោលរបាយការណ៍នេះថា ជារបាយការណ៍ក្លែងក្លាយ៕

ប្រែសម្រួលដោយ រ៉ាន់ រើយ