ព័ត៌មានអន្ដរជាតិ

អ៊ីរ៉ង់ នឹងប្ដឹងទារសំណងខូចខាតទីតាំងប្រវត្តិសាស្ត្រ ដោយសារការវាយប្រហាររបស់អាមេរិក-អ៊ីស្រាអែល

បានផុស

៣ ថ្ងៃ មុន

នៅ

ថ្ងៃចន្ទ ២០ មេសា ២០២៦

ដោយ

អភិបាលខេត្ត Isfahan លោក Mehdi Jamali Nejad កាលពីថ្ងៃទី១៩មេសា បាននិយាយថា ក្រុមអ្នកជំនាញផ្នែកច្បាប់នឹងដាក់ពាក្យបណ្តឹងទៅអង្គការអន្តរជាតិ ពាក់ព័ន្ធការខូចខាតយ៉ាងដំណំលើទីតាំងប្រវត្តិសាស្ត្រជាច្រើន ក្នុងអំឡងពេលវាយប្រហាររវាងសហរដ្ឋអាមេរិក និងអ៊ីស្រាអែល។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានសាធារណរដ្ឋអ៊ីស្លាមអ៊ីរ៉ង់ (IRNA)។

ថ្លែងក្នុងឱកាសនៃ «ទិវាអន្តរជាតិសម្រាប់បូជនីយដ្ឋាន និងរមណីយដ្ឋាន» លោក Mehdi Jamali Nejad បានបញ្ជាក់ជាថ្មីអំពីសារៈសំខាន់នៃការអភិរក្សអគារប្រវត្តិសាស្ត្រ និងទីតាំងបុរាណ។

លោក លើកឡើងថា «បេតិកភណ្ឌវប្បធម៌គឺជាសសរស្តម្ភនៃអនាគតប្រកបដោយចីរភាព។ ជាអកុសល ក្នុងអំឡុងពេលសង្គ្រាម និងការវាយប្រហាររបស់សត្រូវលើទីក្រុងប្រវត្តិសាស្ត្រនេះ ចំណុចប្រមាណ ២០៣ន្លែង នៅក្នុងផ្សារ Grand Bazaar និងវិមានប្រវត្តិសាស្ត្រចំនួន ២៨ ត្រូវបានខូចខាត ដែលសុទ្ធតែត្រូវការការជួសជុលឡើងវិញទាំងអស់»។

លោកបានបន្ថែមថា «យើងបានចាប់ផ្តើមដំណើរការជួសជុលឡើងវិញហើយ ហើយមានបំណងបញ្ចប់ការកសាងឡើងវិញនូវទីតាំងទាំងនេះក្នុងរយៈពេលពីរឆ្នាំដែលនៅសល់នៃរដ្ឋបាលបច្ចុប្បន្ន។ ក្រុមអ្នកច្បាប់មួយត្រូវបានតែងតាំង ហើយសំណុំរឿងមួយត្រូវបានរៀបចំសម្រាប់ពាក្យបណ្តឹង»។

អភិបាលខេត្តរូបនេះបានបញ្ចាក់ជាថ្មីថា បច្ចុប្បន្នក្រុមអ្នកជំនាញបានចំណាយពេលជាច្រើនថ្ងៃនៅ Isfahan ហើយបានចងក្រង និងដាក់ស្នើឯកសារចាំបាច់។ ចំណែកឯនីតិវិធីផ្លូវច្បាប់ទាំងនេះកំពុងដំណើរការទៅមុខ ហើយក៏សង្ឃឹមថានឹងសម្រេចបានលទ្ធផលអំណោយផលផងដែរ៕

អត្ថបទ៖ សាង ស្រីល័ក្ខ