អ៊ីរ៉ង់រាយការណ៍ពីការវាយប្រហារលើកទី២ ក្បែររោងចក្រនុយក្លេអ៊ែរ Bushehr

ស្ថានការណ៍នៅមជ្ឈិមបូព៌ាកាន់តែក្តៅគគុក បន្ទាប់ពីអង្គការថាមពលអាតូមិករបស់អ៊ីរ៉ង់ បានប្រកាសថា សហរដ្ឋអាមេរិក និងអ៊ីស្រាអែល បានបើកការវាយប្រហារលើតំបន់ជុំវិញរោងចក្រថាមពលនុយក្លេអ៊ែរ Bushehr កាលពីយប់ថ្ងៃអង្គារ​ទី​២៤​ខែ​មីនា​ឆ្នាំ​​២០២៦។

យោងតាមទីភ្នាក់ងារព័ត៌មានរដ្ឋ IRNA របាយការណ៍បឋមបានបង្ហាញថា មិនមានការខូចខាតផ្នែកបច្ចេកទេសដល់រោងចក្រ ឬមានអ្នករងរបួស និងបាត់បង់ជីវិតនៅក្នុងព្រឹត្តិការណ៍នេះទេ។

ទីភ្នាក់ងារថាមពលអាតូមិកអន្តរជាតិ (IAEA) ក៏បានបញ្ជាក់ដែរថា ខ្លួនទទួលបានដំណឹងពីខាងអ៊ីរ៉ង់ថាមានគ្រាប់រ៉ុក្កែត ឬមីស៊ីល បានធ្លាក់ចំបរិវេណរោងចក្រ។ ទោះជាយ៉ាងណា ក្នុងសេចក្តីថ្លែងការណ៍លើបណ្តាញសង្គម X អង្គការ IAEA បានឲ្យ​ដឹងថា ប្រតិបត្តិការរបស់រោងចក្រនៅតែដំណើរការជាធម្មតា ហើយមិនមានការខូចខាតដល់រចនាសម្ព័ន្ធស្នូល ឬប៉ះពាល់ដល់បុគ្គលិកឡើយ។ គួររំលឹកផងដែរថា នេះគឺជាលើកទីពីរហើយក្នុងរយៈពេលប៉ុន្មានថ្ងៃចុងក្រោយនេះ ដែលមានការបាញ់ប្រហារក្បែររោងចក្រនេះ បន្ទាប់ពីហេតុការណ៍ស្រដៀងគ្នាមួយបានកើតឡើងកាលពីថ្ងៃទី១៧ខែមីនា។

ចំពេលមានការប្រឈមមុខដាក់គ្នាយ៉ាងតានតឹងនេះ លោក Rafael Mariano Grossi អគ្គនាយកនៃអង្គការ IAEA បានអំពាវនាវយ៉ាងទទូច​ឲ្យ​គ្រប់ភាគីទាំងអស់ចេះអត់ធ្មត់ឲ្យ​បានខ្ពស់បំផុត។ លោកបានសង្កត់ធ្ងន់ថា វាជារឿងចាំបាច់បំផុតដែលត្រូវជៀសវាងរាល់ហានិភ័យទាំងឡាយណា ដែលអាចប៉ះពាល់ដល់សុវត្ថិភាពនុយក្លេអ៊ែរ ក្នុងអំឡុងពេលដែលមានជម្លោះកំពុងបន្តនេះ៕

ប្រែសម្រួល៖ ឈាង