អេស្ប៉ាញ បិទដែនអាកាស មិនឲ្យលោក ត្រាំ យកប្រើដើម្បីវាយអ៊ីរ៉ង់ ឡើយ

អេស្ប៉ាញ នៅតែប្រកាន់ជំហរម៉ឺងម៉ាត់ប្រឆាំងការចូលពាក់ព័ន្ធជាមួយអាមេរិកក្នុងសង្គ្រាមមជ្ឈិមបូព៌ា ដោយឥឡូវថែមទាំងប្រកាសក្តែងៗថា ប្រទេសនេះមិនអនុញ្ញាតឲ្យលោក ដូណាល់ ត្រាំ ប្រើដែនអាកាសរបស់ខ្លួន ក្នុងប្រតិបត្តិការវាយប្រហារអ៊ីរ៉ង់ឡើយ។

នេះគឺជាការបញ្ជាក់ច្បាស់ៗពីសំណាក់រដ្ឋមន្ត្រីការពារជាតិ លោកស្រី Margarita Robles កាលពីថ្ងៃចន្ទទី៣០ខែមីនាឆ្នាំ២០២៦ និងត្រូវបានផ្សាយដោយទីភ្នាក់ងារព័ត៌មាន Reuters។ 

ថ្លែងប្រាប់ក្រុមអ្នកកាសែតក្នុងទីក្រុងម៉ាឌ្រីដ លោកស្រី Robles និយាយថា៖ «រឿងនេះត្រូវបានបញ្ជាក់យ៉ាងច្បាស់ជូនដល់កងទ័ពនិងកម្លាំងសហរដ្ឋអាមេរិក តាំងពីដំបូងមកម៉្លេះ។ ហេតុដូច្នេះហើយ ទាំងមូលដ្ឋានទ័ពក៏មិនត្រូវបានអនុញ្ញាត ហើយសូម្បីតែការប្រើប្រាស់លំហអាកាសរបស់ប្រទេសអេស្ប៉ាញ ក៏មិនត្រូវបានអនុញ្ញាតសម្រាប់សកម្មភាពណាមួយដែលពាក់ព័ន្ធនឹងសង្គ្រាមនៅអ៊ីរ៉ង់នោះដែរ។ ខ្ញុំគិតថាគ្រប់គ្នាបានដឹងពីជំហររបស់អេស្ប៉ាញរួចហើយ»។

ស្របពេលជាមួយគ្នានោះដែរ លោកស្រី Robles បានហៅសង្គ្រាមលើអ៊ីរ៉ង់ថា ជាអំពើខុសច្បាប់យ៉ាងធ្ងន់ធ្ងរ និងអយុត្តិធម៌ខ្លាំងណាស់។

តាំងពីផ្ទុះសង្គ្រាមមជ្ឈិមបូព៌ាដំបូងមកម្ល៉េះ អេស្ប៉ាញបានបង្ហាញដោយចំហថា ខ្លួនប្រឆាំងនឹងលោក ត្រាំ ដោយមិនព្រមអនុញ្ញាតឲ្យអាមេរិក ប្រើមូលដ្ឋានទ័ពរបស់ខ្លួនឡើយ។

នាយករដ្ឋមន្ត្រីអេស្ប៉ាញ Pedro Sanchez ថ្លែងថា ប្រទេសលោកនឹងមិន រួមគំនិតក្នុងរឿងដែលអាក្រក់សម្រាប់ពិភពលោក ជុំវិញសំណើរបស់អាមេរិក ប្រើមូលដ្ឋានទ័ពដើម្បីវាយប្រហារអ៊ីរ៉ង់។

រឿងនេះធ្វើឲ្យលោកត្រាំក្តៅស្លឹកត្រចៀក ឈានដល់ការគំរាមផ្តាច់រាល់ទំនាក់ទំនងពាណិជ្ជកម្មជាមួយទីក្រុងម៉ាឌ្រីដ ទាំងដែលទំនាក់ទំនងរវាងប្រទេសទាំងពីរកំពុងមានភាពតានតឹងស្រាប់ទៅហើយ ជាពិសេសបន្ទាប់ពីអេស្ប៉ាញ ជំទាស់ទៅនឹងលោក ត្រាំ ដែលទាមទារឲ្យសម្ព័ន្ធមិត្តណាតូ បង្កើនថ្លៃចំណាយលើវិស័យការពារជាតិ៕

អត្ថបទ៖ សុខ សុវណ្ណ