ព័ត៌មានអន្ដរជាតិ

បារាំង រួមដៃជាមួយ ចិននិងរុស្ស៊ី ទប់មិនឲ្យប្រើប្រាស់កម្លាំងយោធាលើច្រក Hormuz

បានផុស

៣ ខែ មុន

នៅ

ថ្ងៃសៅរ៍ ៤ មេសា ២០២៦

ដោយ

ចាប់តាំងពីសហរដ្ឋអាមេរិកនិងអ៊ីស្រាអែលបើកការវាយប្រហារលើអ៊ីរ៉ង់នៅថ្ងៃទី២៨ ខែកុម្ភៈ បានបំផ្លាញហេដ្ឋារចនាសម្ព័ន្ធ និងទ្រព្យសម្បត្តិយោធានៃភាគីទាំងបីជាច្រើន ពិសេសឈានដល់បិទច្រកសមុទ្រ Hormuz ដែលជាផ្លូវទឹកដ៏សំខាន់សម្រាប់ពិភពលោកដោយភាគីអ៊ីរ៉ង់។ ការណ៍នេះប្រទេសជាច្រើន កំពុងចួបវិបត្តិប្រេងធ្ងន់ធ្ងរ និងខាតបង់ប្រាក់លើវិស័យផលិតកម្មយ៉ាងសំខាន់។

បណ្តារដ្ឋអារ៉ាប់ដឹកនាំដោយប្រទេសបារ៉ែនកំពុងស្វែងរកសេចក្តីសម្រេចអនុញ្ញាតពីក្រុមប្រឹក្សាសន្តិសុខអង្គការសហប្រជាជាតិ (UNSC) ដើម្បីអន្តរាគមន៍ផ្នែកយោធា បើកច្រកសមុទ្រ Hormuz ឡើងវិញ ខណៈប្រទេសធំៗចំនួនបី មាន រុស្ស៊ី ចិន និង បារាំង បដិសេធចំពោះសេចក្តីសម្រេចដែលស្នើឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមកាសែត Middle East Monitor ផ្សាយថ្ងៃទី០៣ខែមេសា ឆ្នាំ២០២៦ ចំពេលមានជម្លោះកាន់តែខ្លាំងឡើងនៃការបិទច្រកមុទ្រ Hormuz ដោយភាគីអ៊ីរ៉ង វាបានរំខានដល់ទីផ្សារថាមពលសកលយ៉ាងធ្ងន់ធ្ងរ បណ្តាលឱ្យមានការកើនឡើងនៃថ្លៃដើមរបស់ ប្រេង ការដឹកជញ្ជូន និងការធានារ៉ាប់រង។

ចំណែកប្រទេសកាតានិងប្រទេសឈូងសមុទ្រដទៃទៀតត្រូវបង្ខំឱ្យបញ្ឈប់ការផលិតទ្រង់ទ្រាយធំ មានដូចជារោងចក្រ ឧស្សាហកម្មជាដើម និងខាតបង់ប្រចាំឆ្នាំប្រមាណ ២០ប៊ីលានដុល្លារ។

គួរបញ្ជាក់ថាសេចក្តីព្រាងសម្រេចរបស់ប្រទេសបារ៉ែនមានគោលបំណងផ្តល់អំណាចដល់រដ្ឋជាសមាជិកនិងកងកម្លាំងជើងទឹកពហុជាតិសាសន៍ឱ្យប្រើប្រាស់គ្រប់មធ្យោបាយចាំបាច់ទាំងអស់ រួមទាំងកម្លាំងយោធា ដើម្បីធានាបាននូវសុវត្ថិភាពចរាចរណ៍ផ្លូវសមុទ្រ។

យ៉ាងណា ប្រទេសរុស្ស៊ី ចិន និងបារាំង ដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ បានប្រឆាំងនឹងសេចក្តីសម្រេចដែលអនុញ្ញាតឱ្យមានសកម្មភាពយោធាក្នុងច្រក Hormuz ។

ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) លើកឡើងពីជម្រើសយោធាថា៖ « វាជាការមិនប្រាកដប្រជា ហើយអាចបង្កើនការគំរាមកំហែងបង្កឡើងដោយឆ្មាំបដិវត្តន៍អ៊ីរ៉ង់ ដែលពួកគេមានសមត្ថភាពផ្លោងមីស៊ីលតាមបណ្តោយឆ្នេរសមុទ្រក្នុងប្រទេសឈូងសមុទ្រ»។

បើទោះបីជាមានការចរចាលើរឿងនេះច្រើនសប្តាហ៍និងការធ្វើវិសោធនកម្មច្បាប់ក៏ដោយ ក្រុមប្រឹក្សានៅតែជាប់គាំង ធ្វើឱ្យការឯកភាពគ្នាផ្នែកការទូតមិនទំនងកើតឡើងក្នុងពេលដ៏ខ្លីខាងមុខនេះទេ។

ដោយសារតែដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិមិនដំណើរការ ចំណែកអនាគតនៃច្រកសមុទ្រ Hormuz នៅតែមិនប្រាកដប្រជា នាំឱ្យមានអស្ថិរភាពក្នុងតំបន់ ពិសេសវិបត្តិផ្គត់ផ្គង់ថាមពលសកលកាន់តែអូសបន្លាយ៕

ប្រែសម្រួល៖ ណឺ មិនា