អ៊ីរ៉ង់បញ្ជាក់ជំហរថា ខ្លួនមិនបើកច្រក Hormuz ជាថ្នូរនឹងបទឈប់បាញ់បណ្តោះអាសន្នដាច់ខាត

ស្របពេលមានសេចក្តីរាយការណ៍ថា ទាំងអាមេរិកនិងអ៊ីរ៉ង់ សុទ្ធតែទទួលបានផែនការនៃបទឈប់បាញ់ឈានដល់ការពន្លត់ភ្លើងសង្គ្រាមតែម្តងនោះ ស្រាប់តែមន្ត្រីជាន់ខ្ពស់នៅទីក្រុងតេហេរ៉ង់ បានបញ្ជាក់ប្រាប់ទៅ Reuters ថា ខ្លួនមិនបើកច្រក Hormuz ជាថ្នូរនឹងបទឈប់បាញ់បណ្តោះអាសន្នដាច់ខាត។

មន្ត្រីអ៊ីរ៉ង់សុំមិនបញ្ចេញឈ្មោះ បាននិយាយនៅថ្ងៃចន្ទទី៦ខែមេសាឆ្នាំ២០២៦ថា ទីក្រុងតេហេរ៉ង់ បានរក្សាជំហរយ៉ាងច្បាស់រួចហើយ ដូចនេះ កុំយកបទឈប់បាញ់បណ្តោះអាសន្ន មកដោះដូរជាមួយការបើកច្រកសមុទ្រ Hormuz ឲ្យសោះ។

រឿងនេះកើតឡើង ស្របពេល Reuters ដដែល បានរាយការណ៍ថា អុីរ៉ង់និងអាមេរិក បានទទួលផែនការក្របខណ្ឌមួយ ដើម្បីបញ្ឈប់ការវាយប្រហារគ្នា ដែលអាចនឹងចាប់ផ្តើមអនុវត្តនៅដើម្បីសប្តាហ៍នេះតែម្តង។

ផែនការនេះរៀបចំឡើងដោយប្រទេស ប៉ាគីស្ថាន ដោយមេបញ្ជាការកងទ័ព Asim Munir បានទាក់ទងពេញមួយយប់ជាមួយអនុប្រធានាធិបតីអាមេរិក JD Vance និងរដ្ឋមន្ត្រីការបរទេសអុីរ៉ង់ Abbas Araqchi។

យ៉ាងណា គេដឹងថា ក្នុងផែនការនេះ មានចែកចេញជាយុទ្ធសាស្ត្រ ២ ដំណាក់កាល ដោយដំណាក់កាលទី១ ក៏រួមមានទាំងការប្រកាសបទឈប់បាញ់ជាបន្ទាន់ និងបើកច្រកសមុទ្រ Hormuz ឡើងវិញភ្លាមៗផងដែរ។

សម្រាប់ដំណាក់កាលទី២, ភាគីទាំងពីរត្រូវប្រើពេល ១៥ ទៅ ២០ ថ្ងៃ ដើម្បីចរចាឈានទៅរក «កិច្ចព្រមព្រៀងទីក្រុងអ៊ីស្លាម៉ាបាដ» ដែលជាដំណោះស្រាយដ៏ទូលំទូលាយ និងស្ថិតស្ថេរ៕

អត្ថបទ៖ សុខ សុវណ្ណ