ព័ត៌មានអន្ដរជាតិ

អំឡុងសង្រ្គាមជាមួយអ៊ីរ៉ង់ យោធាអាមេរិកផឹកកាហ្វេជាង៣.៦លានលីត្រ និងភេសជ្ជៈប៉ូវកម្លាំងពីរលានកំប៉ុង

បានផុស

៣ ខែ មុន

នៅ

ថ្ងៃព្រហស្បតិ៍ ៩ មេសា ២០២៦

ដោយ

ឧត្តមសេនីយ៍កំពូលសហរដ្ឋអាមេរិក បានបង្ហាញឱ្យដឹងថា ទាហានរបស់ខ្លួនបានផឹកកាហ្វេប្រហែល ៣.៦ លានលីត្រនិងភេសជ្ជៈប៉ូវកម្លាំងពីរលានកំប៉ុង អំឡុងពេលប្រតិបត្តិការរយៈពេលប្រាំមួយសប្តាហ៍នៃជម្លោះជាមួយអ៊ីរ៉ង់។

លោក Dan Caine ប្រធានអគ្គសេនាធិការចម្រុះថ្លែងនៅថ្ងៃទី៨ខែមេសាថា៖ « យើងបានទទួលទានអាហារជាង ៦លានដង ហើយតាមការប៉ាន់ស្មានរបស់ខ្ញុំ យើងផឹកកាហ្វេប្រហែល ៣.៦ លានលីត្រនិងភេសជ្ជៈប៉ូវកម្លាំងពីរលានកំប៉ុង។ ទោះជាយ៉ាងណាក៏ដោយ ខ្ញុំមិននិយាយថានេះជាបញ្ហាទេ»។

ប្រតិបត្តិការយោធារបស់អាមេរិក។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន CBS និង The Independent ផ្សាយថ្ងៃទី៨ ខែមេសា ឆ្នាំ២០២៦ កាហ្វេចំនួន ៣.៦លានលីត្រខាងលើ ស្មើនឹង ៧.៦ លានកែវ។

គួរបញ្ជាក់ថាសហរដ្ឋអាមេរិកដាក់ពង្រាយយោធានៅមជ្ឈិមបូព៌ាចំនួន ៤០ ០០០ ទៅ ៥០ ០០០ នាក់ឈរជើងនៅទូទាំងតំបន់។

ការសិក្សាមួយក្នុងឆ្នាំ ២០១៩ ដោយផ្អែកលើការឆ្លើយតបជាង ២៦ ០០០ ពីយោធាអាមេរិកដែលកំពុងបំពេញកាតព្វកិច្ច មាន ៨៧ភាគរយនៃអ្នកឆ្លើយតប និយាយថាពួកគេកំពុងប្រើប្រាស់ផលិតផលដែលមានជាតិកាហ្វេអ៊ីនយ៉ាងហោចណាស់មួយប្រភេទក្នុងមួយសប្តាហ៍។ ការសិក្សានេះរកឃើញថា៖ « កាហ្វេគឺជាភេសជ្ជៈដែលមានជាតិកាហ្វេអ៊ីនពេញនិយមបំផុតរបស់យោធាអាមេរិក ដោយ ៦៨ភាគរយនៃអ្នកឆ្លើយតបបានប្រើប្រាស់ផលិតផលកាហ្វេ។ ចំណែកភេសជ្ជៈប៉ូវកម្លាំងគឺជាជម្រើសរបស់យោធាចំនួន ២៩ភាគរយ»។

មិនតែប៉ុណ្ណោះ ទាហានដែលបំពេញកាតព្វកិច្ចប្រយុទ្ធច្រើនតែងតែប្រើប្រាស់ផលិតផលផ្ទុកជាតិកាហ្វេអ៊ីនច្រើន ជាពិសេសកាហ្វេនិងភេសជ្ជៈប៉ូវកម្លាំង។

ក្នុងសន្និសីទសារព័ត៌មានមួយនៅថ្ងៃទី៨ ខែមេសា ឧត្តមសេនីយ៍ លោក Caine លើកឡើងថាយោធាអាមេរិកបានវាយប្រហារគោលដៅជាង ១៣ ០០០កន្លែងក្នុងប្រទេសអ៊ីរ៉ង់៕

ប្រែសម្រួល៖ ណឺ មិនា