ព័ត៌មានអន្ដរជាតិ

មេដឹកនាំ កោះGreenland អំពាវនាវឱ្យសម្ព័ន្ធមិត្តណាតូ ក្រោកឈរ ប្រឆាំងដូណាល់ ត្រាំ

បានផុស

៣ ខែ មុន

នៅ

ថ្ងៃសុក្រ ១០ មេសា ២០២៦

ដោយ

នាយករដ្ឋមន្ត្រី Greenland លោក Jens-Frederik Nielsen អំពាវនាវដល់សម្ព័ន្ធមិត្ត NATO ឱ្យក្រោកឈរឡើង ដើម្បីការពារច្បាប់អន្តរជាតិ ក្រោយប្រធានាធិបតីសហរដ្ឋអាមេរិក លោក ដូណាល់ ត្រាំ រិះគន់អង្គការណាតូឥតឈប់ តាំងពីសង្រ្គាមជាមួយអ៊ីរ៉ង់ចាប់ផ្តើម ហើយពេលខ្លះឈានដល់ចង់ដកអាមេរិកចេញពីអង្គការនេះទៀតផង.

នាយករដ្ឋមន្ត្រីនៃកោះស្វយ័ត Greenland បានប្រឆាំងនឹងការអត្ថាធិប្បាយចុងក្រោយរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលប៉ងយកដែនកោះអាកទិកមកកាន់កាប់ដាក់ក្រោមការគ្រប់គ្រងរបស់អាមេរិក ហើយ ចាត់ទុកការហៅរបស់ត្រាំ ជាការប្រមាថ។ នេះបើយោងតាមសារព័ត៌មាន Al Jazeera ផ្សាយថ្ងៃទី៩ ខែមេសា ឆ្នាំ២០២៦ ។

នាយករដ្ឋមន្ត្រី Greenland លោក Jens-Frederik Nielsen រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បង្ហាញការខកចិត្ត តាមរយៈសារបង្ហោះលើបណ្តាញសង្គម Truth Social កាលពីថ្ងៃពុធទី៨ ខែមេសា ឆ្នាំ២០២៦ សរសេរថា៖ «ណាតូ មិនបាននៅទីនោះទេ នៅពេលយើងត្រូវការពួកគេ ហើយពួកគេក៏នឹងមិននៅទីនោះដែរ ប្រសិនបើយើងត្រូវការពួកគេម្តងទៀត។ សូមចងចាំថាកោះ Greenland គ្រាន់តែជាបំណែកទឹកកកដ៏ធំ គ្រប់គ្រងយ៉ាងអន់ និងក្រីក្រទៅៗ»។

យ៉ាងណារបាយការណ៍របស់ Reuters និង The Guardian បង្ហាញថ្មីៗនេះថា ទំនាក់ទំនងណាតូ និងអាមេរិក បានធ្លាក់ចុះដល់ចំណុចទាបបំផុតក្នុងរយៈពេល៧៧ឆ្នាំ។

លោក Nielsen បានបដិសេធចំពោះសម្តី លោក ត្រាំ ដែលលើកឡើងកាលពីថ្ងៃព្រហស្បតិ៍ ពីការកំណត់លក្ខណៈនិងអត្តសញ្ញាណប្រទេសរបស់ខ្លួន។

លោកប្រាប់ទីភ្នាក់ងារសារព័ត៌មានរ៉យទ័រថា៖ « យើងមិនមែនជាបំណែកទឹកកកទេ។ យើងមានមោទនភាពដែលមានអត្រាប្រជាជនចំនួន ៥៧ ០០០នាក់ ធ្វើការជារៀងរាល់ថ្ងៃ។ ជាពលរដ្ឋល្អក្នុងពិភពលោក ដោយគោរពយ៉ាងពេញលេញ ចំពោះសម្ព័ន្ធមិត្តទាំងអស់របស់យើង»។

លោក Nielsen គូសបញ្ជាក់ពីសារៈសំខាន់នៃការរក្សាសណ្តាប់ធ្នាប់ភូមិសាស្ត្រនយោបាយក្រោយសង្គ្រាម រួមទាំងសម្ព័ន្ធមិត្តការពារជាតិណាតូនិងច្បាប់អន្តរជាតិទទួលបានការគោរពទូទាំងពិភពលោក។

លោកមានប្រសាសន៍ថា៖ « ឥឡូវនេះ រឿងទាំងនោះ[អត្តសញ្ញាណ Greenland] កំពុងប្រឈម! ហើយខ្ញុំគិតថាសម្ព័ន្ធមិត្តទាំងអស់គួរតែឈរជាមួយគ្នា ព្យាយាមរក្សាវា។ ខ្ញុំសង្ឃឹមថារឿងនោះ[ក្រោកឈរទាំងអស់គ្នា] នឹងកើតឡើង»៕

ប្រែសម្រួល៖ ណឺ មិនា