អ៊ីស្រាអែល សម្លាប់មនុស្សលើស ២ ០០០នាក់ហើយ នៅលីបង់ បើគិតចាប់ពីថ្ងៃទី២ខែមីនាមក

តួលេខចុងក្រោយរបស់ក្រសួងសុខាភិបាលលីបង់ ដែលបញ្ចេញនៅថ្ងៃសៅរ៍ទី១១ខែមេសាឆ្នាំ២០២៦ បានបង្ហាញថា បើគិតចាប់តាំងពីអ៊ីស្រាអែល បើកប្រតិបត្តិការយោធានៅថ្ងៃទី២ខែមីនាឆ្នាំ២០២៦មក កងទ័ពរបស់លោក Benjamin Netanyahu បានវាយប្រហារផ្តាច់ជីវិតមនុស្សជាង ២ ០០០នាក់ហើយ ក្នុងប្រទេសលីបង់។

ក្នុងរបាយការណ៍ដែលផ្សាយដោយ Anadolu, ក្នុងរយៈពេល៤១ថ្ងៃ អ៊ីស្រាអែល សម្លាប់មនុស្សនៅលីបង់ចំនួន ២ ០២០នាក់ ក្នុងនោះមនុស្ស៩៧នាក់ ត្រូវបានសម្លាប់ត្រឹមរយៈពេល២៤ម៉ោងចុងក្រោយ។

ក្នុងចំណោមមនុស្សស្លាប់នោះផងដែរ គឺរួមមានកុមារ១៦៥នាក់និងស្រ្តី២៤៨នាក់។

ក្រៅពីមនុស្សស្លាប់ នៅមានមនុស្ស៦ ៤៣៦នាក់របួស ក្នុងនោះមានកុមាររបួស៦៤១នាក់និងស្រ្តីរបួស ១ ១០៧នាក់។

អ្វីដ៏សែនរន្ធត់គឺ ត្រឹមមួយថ្ងៃពុធប៉ុណ្ណោះ មានមនុស្សរហូតដល់ទៅ៣០៣នាក់ ត្រូវសម្លាប់និង ១ ១៥០នាក់ រងរបួសក្នុងការវាយប្រហាររបស់អ៊ីស្រាអែល ខណៈក្នុងចំណោមមនុស្សស្លាប់ទាំងអស់នោះ ក៏បូករួមទាំងស្រ្តី៧១នាក់ កុមារ៣០នាក់និងមនុស្សចាស់៩នាក់ផងដែរ៕

អត្ថបទ៖ សុខ សុវណ្ណ