អាមេរិក​ លើក​លែក​ទ្រព្យ​​បង្កក​២០ពាន់​លានដុល្លារឲ្យ​អ៊ីរ៉ង់ ជាថ្នូរនឹងការដោះដូរអ៊ុយរ៉ាញ៉ូម

យោងតាមរបាយការណ៍ពី Axios ចុះផ្សាយ​ថ្ងៃទី១៧ខែមេសា សហរដ្ឋអាមេរិកបានផ្តល់ជូនការលើកលែង​ទ្រព្យសម្បត្តិដែលបង្កករបស់អ៊ីរ៉ង់ចំនួន២០​ពាន់​លានដុល្លារ ជាថ្នូរនឹងការប្រគល់អ៊ុយរ៉ាញ៉ូមចម្រាញ់រួច​របស់អ៊ីរ៉ង់​ទៅ​ឲ្យ​អាមេរិក​​ ដែលជាផ្នែក​មួយ​នៃកិច្ចចរចាដើម្បីបញ្ចប់សង្គ្រាម។

សំណើនេះបង្ហាញពីការខិតជិតគ្នានៃជំហរភាគីទាំងពីរ បន្ទាប់ពីកាលពីមុន អាមេរិកត្រៀមលើកលែង​ទ្រព្យ​សម្បត្តិ​បង្កក​ត្រឹមតែ៦ពាន់​លានដុល្លារប៉ុណ្ណោះ ខណៈដែលអ៊ីរ៉ង់បានទាមទាររហូតដល់​២៧ពាន់​លានដុល្លារ។

ផែនការនេះក៏រួមបញ្ចូលផងដែរនូវការផ្អាកដោយស្ម័គ្រចិត្តលើការចម្រាញ់អ៊ុយរ៉ាញ៉ូមនៅក្នុងប្រទេសអ៊ីរ៉ង់។ នៅក្រោមសំណើ អ៊ីរ៉ង់នឹងត្រូវបានអនុញ្ញាតឲ្យ​បន្តការស្រាវជ្រាវនុយក្លេអ៊ែរ និងការងារលើអ៊ីសូតូបវេជ្ជសាស្ត្រ ប៉ុន្តែត្រូវធ្វើឡើងនៅតាមទីតាំងលើដីតែប៉ុណ្ណោះ។ ទោះជាយ៉ាងណាក៏ដោយ ភាពខុសគ្នាដ៏ធំនៅតែមានលើរយៈពេលនៃការផ្អាកនេះ ដោយសហរដ្ឋអាមេរិកទទូចឲ្យ​ផ្អាករយៈពេល​២០ឆ្នាំ ខណៈដែលទីក្រុងតេហេរ៉ង់ចង់ផ្អាកត្រឹមតែ៥ឆ្នាំ។

បច្ចុប្បន្ន ក្រុមអ្នកសម្របសម្រួលកំពុងខិតខំប្រឹងប្រែងយ៉ាងខ្លាំង ដើម្បីជួយឲ្យ​ភាគីទាំងពីរអាចឈានទៅរកកិច្ចព្រមព្រៀងចុងក្រោយមួយដែលគ្រប់គ្នាអាចទទួលយកបាន៕

ប្រែសម្រួល៖ ឈាង