ស្រោមអនាម័យ អាច​ឡើង​ថ្លៃ​ឆាប់ៗ ព្រោះ​សង្គ្រាម​នៅ​អ៊ីរ៉ង់

សង្រ្គាមដែលកំពុងឆាបឆេះរវាងអាមេរិក និងអ៊ីរ៉ង់ មិនត្រឹមតែប៉ះពាល់ដល់ជីវភាពរស់នៅ និងនយោបាយប៉ុណ្ណោះទេ ប៉ុន្តែឥឡូវនេះវាបានរាលដាលដល់វិស័យសុខភាពផ្លូវភេទទៀតផង។

តាម​ការ​ចេញ​ផ្សាយ​នា​ថ្ងៃទី​២២​ខែមេសា​ឆ្នាំ​២០២៦​របស់​សារព័ត៌មាន CNN លោក Goh Miah Kiat ដែលជានាយកប្រតិបត្តិនៃក្រុមហ៊ុន Karex ជាក្រុមហ៊ុនផលិតស្រោមអនាម័យធំជាងគេបំផុតនៅលើពិភពលោក បានបង្ហើបឲ្យ​ដឹងថា តម្លៃស្រោមអនាម័យអាចនឹងត្រូវដំឡើងពី ២០ ទៅ ៣០ភាគរយ បើវិបត្តិសង្រ្គាមនៅតែបន្តរំខានដល់ការដឹកជញ្ជូនទំនិញជាសកលបែបនេះ។

ក្រុមហ៊ុនយក្សដែលមានមូលដ្ឋាននៅប្រទេសម៉ាឡេស៊ីមួយនេះ គឺជាអ្នកផលិតស្រោមអនាម័យម៉ាកល្បីៗដូចជា ONE, Trustex, និង Carex ជាដើម ដោយក្នុងមួយឆ្នាំៗពួកគេផលិតបានច្រើនជាង ៥ពាន់លានស្រោម ដើម្បីនាំចេញទៅកាន់ជាង ១៣០ប្រទេស។ លោកនាយកប្រតិបត្តិបានពន្យល់​ថា ដោយសារតែការបិទខ្ទប់ផ្លូវទឹកនៅច្រកសមុទ្រហ័រមូស វាបានធ្វើ​ឲ្យវត្ថុធាតុដើមសំខាន់ៗដែលយកមកផលិតស្រោមអនាម័យ មិនអាចដឹកចេញមកបាន។ កត្តានេះហើយទើបបង្ខំឲ្យ​ក្រុមហ៊ុនគ្មានជម្រើសអ្វីក្រៅពីការបង្វែរការចំណាយដ៏ខ្ពស់នេះ ទៅលើអតិថិជនអ្នកប្រើប្រាស់វិញនោះទេ។

ក្រៅពីបញ្ហាវត្ថុធាតុដើម ការដឹកជញ្ជូនតាមកប៉ាល់ក៏កំពុងជួបផលវិបាកខ្លាំងដែរ។ បច្ចុប្បន្ន មានស្រោមអនាម័យរាប់លានកំពុងជាប់គាំងនៅលើកប៉ាល់កណ្តាលសមុទ្រ ដែលមិនទាន់អាចធ្វើដំណើរទៅដល់គោលដៅ បើទោះបីជាទីផ្សារកំពុងមានតម្រូវការខ្ពស់ក៏ដោយ។ លោក Goh បានបញ្ជាក់ថា ពេលនេះក្រុមហ៊ុននៅមានផលិតផលក្នុងស្តុកសម្រាប់ផ្គត់ផ្គង់បានប៉ុន្មានខែទៀត ប៉ុន្តែស្ថានភាពនាពេលខាងមុខគឺពិតជាងាយរងគ្រោះខ្លាំងណាស់។

អ្វីដែលគួរ​ឲ្យ​បារម្ភនោះគឺ សង្រ្គាមបានធ្វើឲ្យ​ខ្វះខាតសារធាតុគីមីដែលផលិតចេញពីប្រេងកាត ដូចជាប្រេងស៊ីលីកូន និងអាម៉ូញាក់ ដែលជាគ្រឿងផ្សំមិនអាចខ្វះបានក្នុងការផលិតស្រោមអនាម័យ។ បញ្ហានេះមិនត្រឹមតែប៉ះពាល់ដល់រោងចក្រប៉ុណ្ណោះទេ សូម្បីតែជីវភាពកម្មករក៏កំពុងជួបការលំបាកដែរ។ នៅតាមបណ្តាប្រទេសក្នុងតំបន់អាស៊ីអាគ្នេយ៍ដូចជា កម្ពុជា មីយ៉ាន់ម៉ា និងវៀតណាម ការឡើងថ្លៃប្រេងសាំងបានធ្វើឲ្យការធ្វើដំណើរទៅធ្វើការកាន់តែពិបាក ដែលអាចបណ្តាលឲ្យសង្វាក់ផលិតកម្មទាំងមូលត្រូវយឺតយ៉ាវ និងខ្វះខាតទំនិញផ្គត់ផ្គង់ទៅកាន់ពិភពលោកក្នុងពេលដ៏ខ្លីខាងមុខ៕

ប្រែសម្រួល៖ ឈាង