ព័ត៌មានអន្ដរជាតិ

WSJ៖ អារ៉ាប់រួម ពិតជាបានចូលដៃជើងជាមួយអាមេរិក-អ៊ីស្រាអែល វាយប្រហារអ៊ីរ៉ង់

បានផុស

២ ខែ មុន

នៅ

ថ្ងៃអង្គារ ១២ ឧសភា ២០២៦

ដោយ

កាសែត Wall Street Journal ដែលមានមូលដ្ឋាននៅសហរដ្ឋអាមេរិក បានរាយការណ៍ថា ប្រទេសអេមីរ៉ាតអារ៉ាប់រួមដែលស្ថិតនៅតំបន់មជ្ឈិមបូព៌ា ជាប្រទេសតែមួយគត់ដែលចូលរួមជាមួយសហរដ្ឋអាមេរិកនិងអ៊ីស្រាអែល បានវាយប្រហារដោយយោធាប្រឆាំងប្រទេសអ៊ីរ៉ង់។

សេចក្តីរាយការណ៍ចេញផ្សាយកាលពីថ្ងៃចន្ទ ទី១១ ខែឧសភា ឆ្នាំ២០២៦ បានលើកឡើងថា ការវាយប្រហារទាំងនោះ រួមមានការវាយប្រហារលើរោងចក្រចម្រាញ់ប្រេងមួយកន្លែងនៅលើកោះ Lavan របស់អ៊ីរ៉ង់ក្នុងឈូងសមុទ្រពែរ្ស។ ការវាយប្រហារមួយ បានកើតឡើងនៅដើមខែមេសា ពេលប្រធានាធិបតីអាមេរិក លោក ដូណាល់ ត្រាំ ប្រកាសបទឈប់បាញ់ ប៉ុន្តែមិនបានបញ្ជាក់ថា ការវាយប្រហារមុន ឬក្រោយការប្រកាសនោះទេ។

អ៊ីស្រាអែល-អាមេរិកវាយលើឃ្លាំងប្រេងអ៊ីរ៉ង់។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត WSJ កត់សម្គាល់ថា អ៊ីរ៉ង់បានទទួលស្គាល់នៅពេលនោះថា ទីតាំងដែលត្រូវបានវាយប្រហារដោយសត្រូវ តែមិនបានបញ្ជាក់ថាតើ ប្រទេសណាជាអ្នកវាយប្រហារខ្លួននោះទេ បន្ទាប់មកអ៊ីរ៉ង់បានឆ្លើយតបដោយការបាញ់មីស៊ីល និងដ្រូនទៅលើប្រទេសអារ៉ាប់រួម និងប្រទេសគុយវ៉ែតវិញ។

គួរបញ្ជាក់ថា ការវាយប្រហារលើកោះ Lavan គឺជាឧទាហរណ៍ជាក់លាក់តែមួយដែលបង្ហាញថាប្រទេសអារ៉ាប់រួមបានចូលរួមក្នុងសង្គ្រាមដូចបានរៀបរាប់នៅក្នុងរបាយការណ៍។

WSJ បានស្រង់ប្រភពមួយដែលអះអាងថា ទីក្រុងវ៉ាស៊ីនតោនទទួលបានការចូលរួមយ៉ាងវិជ្ជមានពីទីក្រុងអាប៊ូដាប៊ីក្នុងសង្គ្រាម បន្ទាប់ពីប្រទេសឈូងសមុទ្រដទៃទៀតបដិសេធចូលរួមនៅក្នុងជម្លោះនេះ។

យ៉ាងណា ជុំវិញបញ្ហានេះ ក្រសួងការបរទេសអារ៉ាប់រួមបដិសេធសំណើអត្ថាធិប្បាយ ប៉ុន្តែធ្លាប់ប្រកាសពីមុនថាខ្លួនមានសិទ្ធិឆ្លើយតបទៅនឹងការវាយប្រហាររបស់អ៊ីរ៉ង់។ មន្ទីរបញ្ចកោណក៏បដិសេធមិនអត្ថាធិប្បាយដែរ។

កាលពីខែមីនា ប្រព័ន្ធផ្សព្វផ្សាយ Hebrew (សំដៅលើប្រព័ន្ធផ្សព្វផ្សាយដំណើរការដោយក្រុមប្រើប្រាស់ភាសាជី្វស) ជាច្រើន បានចេញផ្សាយរបាយការណ៍ស្ទើរតែក្នុងពេលដំណាលគ្នាថា អារ៉ាប់រួមបានវាយប្រហាររោងចក្រចម្រាញ់ទឹកប្រៃមួយនៅអ៊ីរ៉ង់ ដើម្បីឆ្លើយតបទៅនឹងការវាយប្រហាររបស់ទីក្រុងតេហេរ៉ង់នៅទូទាំងឈូងសមុទ្រ៕

ប្រែដោយ៖ ណឺ មិនា