ក្រោយ អ៊ីស្រាអែល បាញ់មីស៊ីលបំផ្លាញមណ្ឌលសុខភាពខ្ទេចស្ទើរគ្មានសល់ WHO ថា បុគ្គលិកសុខាភិបាលតំបន់ហ្គាហ្សា ត្រូវតែមានការការពារ

មន្ត្រីជាន់ខ្ពស់របស់អង្គការសុខភាពពិភពលោក (WHO) បាននិយាយកាលពីថ្ងៃចន្ទថា ហានិភ័យចំពោះបុគ្គលិកថែទាំសុខភាព ក្នុងអំឡុងពេលអំពើហិង្សាថ្មីៗនេះ នៅក្នុងទឹកដីដែលកាន់កាប់ដោយប៉ាឡេស្ទីន និងអ៊ីស្រាអែល ត្រូវតែមានការយកចិត្តទុកដាក់ខ្ពស់ ។

អគ្គនាយក WHO លោក Tedros Ghebreyesus បាននិយាយនៅក្នុងសន្និសីទកាសែតមួយថា “បុគ្គលិកសុខាភិបាល និងហេដ្ឋារចនាសម្ព័ន្ធ គួរតែត្រូវបានការពារជានិច្ច ហើយខ្ញុំសូមអំពាវនាវ ឲ្យថ្នាក់ដឹកនាំគ្រប់ភាគីទាំងអស់ ធានានូវការគោរពចំពោះ ច្បាប់មនុស្សធម៌ដ៏សំខាន់ទាំងនេះ” ។

ការអំពាវនាវឲ្យមានការពារនេះធ្វើឡើង បន្ទាប់ពីប្រទេសអ៊ីស្រាអែល នៅតែបន្តការវាយតាមអាកាសរបស់ខ្លួន ដោយបានបាញ់មីស៊ីល ២ គ្រាប់ទៀត ទៅលើមណ្ឌលសុខភាពមួយកន្លែង នៅតំបន់ហ្គាហ្សា កាលពីថ្ងៃចន្ទ ប៉ុន្តែមិនទាន់មានសេចក្ដីរាយការណ៍ពីការស្លាប់ និងរងរបួសឡើយ ។

យោងតាមក្រសួងសុខាភិបាលប៉ាឡេស្ទីន នៅតំបន់ហ្គាហ្សា បានឲ្យដឹងថា មីស៊ីលទាំងនោះ បានវាយប្រហារទៅលើមណ្ឌលសុខភាព Al-Daraj Martyrs ដែលបណ្ដាលឲ្យខូចខាតយ៉ាងធ្ងន់ធ្ងរ ដល់រចនាសម្ព័ន ស្ទើរតែទាំងស្រុង ។

គិតត្រឹមពេលនេះ យ៉ាងហោចណាស់ ប្រជាជនប៉ាឡេស្ទីនចំនួន ២១២ នាក់ត្រូវបានសម្លាប់ រួមទាំងកុមារ ៦១ នាក់ និងស្ត្រី ៣៥ នាក់ផងដែរ នៅក្នុងការវាយប្រហាររបស់អ៊ីស្រាអែល ទៅលើតំបន់ហ្គាហ្សាស្ទ្រីប ចាប់តាំងពីសប្តាហ៍មុន ។ នេះបើយោងតាមក្រសួងសុខាភិបាលប៉ាឡេស្ទីន ដែលមានមូលដ្ឋាននៅតំបន់ហ្គាហ្សា ។

បន្ថែមពីនេះ មនុស្សជាង ១១,៣០៥ នាក់បានរងរបួស ហើយអគាររាប់សិបត្រូវបានបំផ្លាញ ឬខូចខាតនៅក្នុងការវាយប្រហាររបស់អ៊ីស្រាអែល ខណៈនៅអ៊ីស្រាអែលវិញ មនុស្ស ១០ នាក់ក៏ត្រូវបានសម្លាប់ ដោយគ្រាប់រ៉ុកកែតរបស់ប៉ាឡេស្ទីន ពីតំបន់ហ្គាហ្សាស្ទ្រីបផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អ៊ីស្រាអែល ដាក់មីស៊ីល ២ គ្រាប់ទៀត បំផ្លាញមណ្ឌលសុខភាពនៅតំបន់ហ្គាហ្សា ខ្ទេចស្ទើរគ្មានសល់ មិនឲ្យព្យាបាលអ្នករងរបួស

ចុចអាន ៖ ប៉ាឡេស្ទីន ឲ្យ UN ជួយបញ្ឈប់ឧក្រិដ្ឋកម្មសង្គ្រាមរបស់អ៊ីស្រាអែល មកលើតំបន់ហ្គាហ្សា ដោយអាណិតដល់ក្មេងៗដែលមិនដឹងអី