ពាក់ហើយចោលៗ ម៉ាស កំពុងដាក់បន្ទុកកាន់តែធ្ងន់ដល់បញ្ហាមួយទៀតនៅ ហ្វីលីពីន

ជំងឺរាតត្បាតកូវីដ ១៩ កំពុងបន្ថែមបន្ទុកសម្រាប់ការបំពុលបរិស្ថាន នៅឯទីប្រជុំជន Bauan ដែលជាកន្លែងមុជទឹកដ៏ពេញនិយមមួយ នៅក្នុងខេត្ត Batangas របស់ប្រទេសហ្វីលីពីន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្ញៀវទេសចរ និងអ្នកស្រុកបានរាយការណ៍ថា មានការកើនឡើងនូវចំនួនម៉ាស និងឈុតការពារឆ្លងជំងឺកូវីដ ១៩ (PPE) ដែលត្រូវបានប្រមូលពីបាតសមុទ្រ ។

លោក Arnel Vergara អ្នកជំនាញមុជទឹកជនជាតិហ្វីលីពីន ដែលបានមុជទឹកនៅតំបន់នោះ បាននិយាយថា “វាប្រហែលជាដោយសារមនុស្សមួយចំនួន ដែលជិះទូកលេងកម្សាន្ត គ្រាន់តែពាក់ម៉ាស់មួយភ្លេត ហើយដោះវាចោល ឬអ្នកផ្សេងមិនបានបោះវាចោល ឲ្យបានត្រឹមត្រូវសម្រាប់ឆ្នាំកន្លងមកនេះ” ។

ចំណែកលោកស្រី Carmela Sevilla ជាម្ចាស់រមណីយដ្ឋាន និងជាអ្នកបង្ហាត់មុជទឹក បាននិយាយថា ម៉ាសទាំងនេះត្រូវបានបន្ថែម ទៅក្នុងថង់ផ្លាស្ទិច ថង់ក្រណាត់ កន្ទបទារក និងសម្ភារៈវេចខ្ចប់នានា ដែលកំពុងពាសពេញដែនទឹកក្នុងរដូវមូសុង ។

រីឯលោក Girro Maranan មន្រ្តីនៅការិយាល័យទេសចរណ៍ខេត្ត Batangas បាននិយាយថា “ក្រុមមន្រ្តីបានដឹងអំពីបញ្ហានេះ ហើយកំពុងដឹកនាំកិច្ចប្រឹងប្រែងសម្អាត ព្រោះថាបើយើងបណ្ដោយ ភាពចម្រុះនៃសមុទ្ររបស់យើង គឺរងផលប៉ះពាល់ខ្លាំងបំផុត” ។

ទន្ទឹមនោះ លោកស្រី Marian Ledesma អ្នកធ្វើយុទ្ធនាការរបស់អង្គការ Greenpeace នៅប្រទេសហ្វីលីពីន បាននិយាយថា ការគ្រប់គ្រងមិនបានល្អ នៃយុទ្ធសាស្ត្របោះចោលសំរាមរបស់ប្រទេសនេះ បាននាំឲ្យមានការប្រមូលសំរាម នៅក្នុងដៃទន្លេរបស់ខ្លួន កាន់តែកើនឡើង ៕

ប្រែសម្រួលដោយ ៖ ជីវ័ន្ត

ប្រភព ៖ A24 news agency

ចុចអាន ៖ ហ្វីលីពីន បន្តបិទព្រំដែនសម្រាប់អ្នកដំណើរពីប្រទេសចំនួន ៧ ដល់ពាក់កណ្តាលខែមិថុនា ជាពិសេសការពារឆ្លងវីរុសបំប្លែងខ្លួន

ចុចអាន ៖ ហ្វីលីពីន ចាប់ផ្ដើមចាក់វ៉ាក់សាំង Sinovac ដល់អត្តពលិកចូលរួមព្រឹត្តិការណ៍កីឡាអូឡាំពិកទីក្រុងតូក្យូ