ថៃ កក់វ៉ាក់សាំង Pfizer-BioNTech ចំនួន ២០ លានដូស រំពឹងទទួលបានមុនដំណាច់ឆ្នាំនេះ

រដ្ឋមន្រ្តីក្រសួងសុខាភិបាលថៃ បាននិយាយថា ប្រទេសថៃបានចុះហត្ថលេខា លើការបញ្ជាទិញវ៉ាក់សាំងការពារជំងឺកូវីដ ១៩ របស់ក្រុមហ៊ុន Pfizer-BioNTech ចំនួន ២០ លានដូស ហើយនឹងត្រូវចែកចាយ មុនដំណាច់ឆ្នាំនេះ ។

រដ្ឋមន្រ្តីក្រសួងសុខាភិបាលថៃ លោក Anutin Charnvirakul បាននិយាយកាលពីថ្ងៃព្រហស្បតិ៍ថាព័ត៌មានលម្អិតនៃកិច្ចព្រមព្រៀង ពេលវេលានៃការចែកចាយ និងការអនុម័តចាក់វ៉ាក់សាំង ដោយរដ្ឋបាលចំណីអាហារ និងឱសថថៃ នឹងត្រូវអនុវត្តក្នុងរយៈពេល ប្រហែលមួយខែទៀត ។

ទន្ទឹមនោះ ប្រទេសថៃក៏គ្រោងនឹងទិញវ៉ាក់សាំង ចាក់តែមួយដូស Johnson & Johnson ចំនួន ៥ លានដូសក្នុងឆ្នាំនេះផងដែរ ។

ប្រទេសថៃកំពុងប្រណាំងដើម្បីទទួលបានវ៉ាក់សាំង សម្រាប់យុទ្ធនាការចាក់ថ្នាំបង្ការរោគដ៏ធំរបស់ខ្លួន ដែលបានចាប់ផ្តើមកាលពីថ្ងៃចន្ទ ពោលរយៈពេល ២ ខែ បន្ទាប់ពីប្រទេសនេះ ទទួលរងការផ្ទុះជំងឺកូវីដ ១៩ ដ៏ធំបំផុតរបស់ខ្លួន ក៏ដូចជាវីរុសបំប្លែងខ្លួនថ្មីជាដើម ។

បច្ចុប្បន្ន យុទ្ធនាការចាក់វ៉ាក់សាំងរបស់ប្រទេសថៃ កំពុងពឹងផ្អែកយ៉ាងខ្លាំងទៅលើវ៉ាក់សាំង AstraZeneca ផលិតក្នុងស្រុក ដែលបានបម្រុងទុកចំនួន ៦១ លានដូស ប៉ុន្តែរដ្ឋាភិបាលបានព្យាយាមរកប្រភពវ៉ាក់សាំងជាច្រើនផ្សេងទៀត ដើម្បីបំពេញតាមគោលដៅរបស់ខ្លួន ក្នុងការទទួលបាន ១០០ លានដូស នៅចុងឆ្នាំនេះ ។

គិតត្រឹមពេលនេះ ប្រជាជនថៃប្រមាណ ៤.១ លាននាក់ ក្នុងចំណោមប្រជាជនជាង ៦៦ លាននាក់ បានទទួលការចាក់វ៉ាក់សាំងការពារជំងឺកូវីដ ១៩ ដូសដំបូង ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ស្ងាត់ៗ ឡាវ ត្រៀមចាក់វ៉ាក់សាំង Pfizer មួយទៀតដល់មនុស្សចាស់ និងអ្នកមានជំងឺរ៉ាំរ៉ៃ