មន្ត្រីដែលនិយាយថា គ្មានភស្តុតាងអំពីការក្លែងបន្លំសន្លឹកឆ្នោតត្រូវលោកTrump បណ្តេញចេញពីតំណែង

នៅថ្ងៃពុធនេះ លោកប្រធានាធិបតី Donald Trump បានបណ្តេញមន្រ្តីក្រសួងសន្តិសុខមាតុភូមិម្នាក់ចេញពីតំណែង។ មន្ត្រីរូបនេះគឺជាអ្នកច្រានចោលការអះអាងរបស់លោក Trump ពីការលួចបន្លំសន្លឹកឆ្នោត។

លោក Trump បានប្រកាសនៅលើបណ្តាញសង្គម Twitter ថា លោកបានបណ្តេញលោក Chris Krebs នាយកភ្នាក់ងារសន្តិសុខអ៊ីនធឺណិត​​និងសន្តិសុខហេដ្ឋារចនាសម្ព័ន្ធចេញពីតំណែងហើយបានភ្ជាប់វាដោយផ្ទាល់ទៅនឹងសេចក្តីថ្លែងការណ៍របស់លោក Krebs ដែលនិយាយថា គ្មានភស្តុតាងដែលថា ប្រព័ន្ធបោះឆ្នោតណាមួយត្រូវបានលុបចោលឬបាត់សន្លឹកឆ្នោត ផ្លាស់ប្តូរសំឡេងឆ្នោតឬវិធីណាមួយត្រូវបានរៀបចំនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Trump បាននិយាយនៅក្នុង Twitter ថា “សេចក្តីថ្លែងការណ៍នាពេលថ្មីៗនេះរបស់លោក Chris Krebs ស្តីពីសន្តិសុខនៃការបោះឆ្នោតឆ្នាំ២០២០គឺមិនត្រឹមត្រូវទាល់តែសោះដែលថាក្នុងនោះមានការក្លែងបន្លំនិងភាពមិនប្រក្រតីយ៉ាងច្រើន។ ដូច្នេះលោក Krebs ត្រូវបានបញ្ឈប់ពីតំណែងជានាយកភ្នាក់ងារសន្តិសុខអ៊ីនធឺណិត​​និងសន្តិសុខហេដ្ឋារចនាសម្ព័ន្ធភា្លមៗ”។

ក្នុងរយៈពេលប៉ុន្មានថ្ងៃថ្មីៗនេះ លោក Krebs បានលើកឡើងម្តងហើយម្តងទៀតប្រឆាំងនឹងការចោទប្រកាន់មិនពិតដែលថាការបោះឆ្នោតត្រូវបានក្លែងបន្លំ។ នៅព្រឹកថ្ងៃពុធនេះ លោកបានបង្ហោះរបាយការណ៍ដោយដកស្រង់សម្តីអ្នកជំនាញសន្តិសុខបោះឆ្នោតចំនួន៥៩នាក់ដោយនិយាយថា មិនមានភស្តុតាងដែលអាចជឿទុកចិត្តបាននៃការលួចបន្លំតាមកុំព្យូទ័រនៅក្នុងលទ្ធផលបោះឆ្នោតឆ្នាំ២០២០នេះទេ៕

ប្រែសម្រួលដោយ៖ Vann Vann

ប្រភព៖ CNN, AP