រដ្ឋមន្ត្រីសុខាភិបាល ទើបឡើងថ្មីរបស់ អង់គ្លេស នឹងបន្ធូរបន្ថយការរឹតត្បិតប្រទេស ទោះករណីឆ្លង​កើនឡើងក៏ដោយ

ករណីឆ្លងជំងឺកូវីដ ១៩ កំពុងរីករាលដាលម្តងទៀតនៅក្នុងប្រទេសអង់គ្លេស ខណៈភាគច្រើននៃករណីទាំងនោះ គឺជាវីរុសបំប្លែងខ្លួនឥណ្ឌា ដែលគេស្គាល់ថា “Delta” ។

ទោះយ៉ាងណា រដ្ឋាភិបាលគ្រោងនឹងបន្ធូរបន្ថយការរឹតត្បិតដែលនៅសេសសល់ ប្រឆាំងនឹងវីរុសនៅប្រទេសអង់គ្លេសនាខែក្រោយតាមការគ្រោងទុក ដោយផ្អែកលើការវាយតម្លៃថា ចំនួនអ្នកស្លាប់នៅតែមានកម្រិតទាប ដោយសារយុទ្ធនាការចាក់វ៉ាក់សាំង ។

បច្ចុប្បន្ន វីរុសបំប្លែងខ្លួនឥណ្ឌា កំពុងវាយលុកប្រមាណ ៩៥ ភាគរយនៃករណីឆ្លងថ្មីនៅក្នុងប្រទេសអង់គ្លេស ។

ទន្ទឹមនោះ កាលពីថ្ងៃចន្ទអាជ្ញាធរសុខាភិបាលបានរាយការណ៍ថា មានករណីឆ្លងប្រចាំថ្ងៃថ្មីចំនួន ២២,៨៦៨ ករណី ខណៈតួលេខនេះលើសពី ២ ម៉ឺនករណីជាលើកដំបូង ចាប់តាំងពីដើមខែកុម្ភៈ ប៉ុន្តែមានអ្នកស្លាប់ថ្មីតែ ៣ នាក់ប៉ុណ្ណោះ ។

ចំណែករដ្ឋមន្រ្តីក្រសួងសុខាភិបាលថ្មីរបស់អង់គ្លេសគឺលោក Sajid Javid បានប្រាប់សភាកាលពីថ្ងៃចន្ទថា បច្ចុប្បន្នចំនួនករណីឆ្លងកំពុងតែកើនឡើង ឯចំនួនអ្នកស្លាប់នៅតែទាប ដោយសារយុទ្ធនាការចាក់វ៉ាក់សាំង ។ លោកបានបន្ថែមថា ចំនួនអ្នកដែលសម្រាកព្យាបាលនៅមន្ទីរពេទ្យ ក៏មានចំនួនតិចជាងខែមករាដែរ បើទោះករណីឆ្លងបានកើនឡើងក៏ដោយ ។

លោក Javid បានកត់សម្គាល់ថា វីរុសមិនទាន់អាចកម្ចាត់ទេ ហើយមនុស្សត្រូវតែរៀនរស់នៅជាមួយវា ដូច្នេះការរឹតបន្តឹងដែលនៅសេសសល់ រួមមានទាំងក្លិបរាត្រី និងកន្លែងផ្សេងទៀត នឹងត្រូវដកចេញ ដូចដែលបានគ្រោងទុកនៅថ្ងៃទី ១៩ ខែកក្កដា ។

ជាចុងក្រោយលោក Javid ក៏បានលើកឡើងផងដែរថា រដ្ឋាភិបាលក៏មានគោលបំណងបញ្ចប់ការចាក់វ៉ាក់សាំង សម្រាប់មនុស្សដែលមានអាយុចាប់ពី ១៨ ឆ្នាំឡើងទៅផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កុមារីអាយុត្រឹម ១១ ឆ្នាំ ផ្តល់កំណើតកូន ក្លាយជាម្តាយវ័យក្មេងជាងគេបំផុតរបស់ អង់គ្លេស