ក្ដៅៗ លោក ប្រាយុទ្ធ ចាន់អូចា កំពុងធ្វើចត្តាឡីស័ក ក្រោយប៉ះផ្ទាល់ជាមួយអ្នកជំងឺកូវីដនៅ ភូកេត

មន្ត្រីសាធារណៈម្នាក់ដែលបានចូលរួមពិធីបើកសម្ពោធជាផ្លូវការនូវគម្រោង “ប្រអប់​ខ្សាច់​ភូកេត ឬ Phuket Sandbox” កាលពីសប្តាហ៍មុន ហើយបានថតរូប Selfie ជាមួយនាយករដ្ឋមន្រ្តី ប្រាយុទ្ធ ចាន់អូចា ក្រោយមកត្រូវបានគេធ្វើតេស្តវិជ្ជមានជំងឺកូវីដ ១៩ បន្ទាប់ពីត្រលប់ទៅស្រុកកំណើតរបស់គាត់វិញ ។

ទន្ទឹមនោះប្រព័ន្ធផ្សព្វផ្សាយថៃបានរាយការណ៍ថា លោកនាយករដ្ឋមន្រ្តី ប្រាយុទ្ធ ចាន់អូចា ដែលត្រូវបានចាក់វ៉ាក់សាំងការពារជំងឺកូវីដ ១៩ ពេញ ២ ដូស បានធ្វើតេស្តអវិជ្ជមានជំងឺកូវីដ ១៩ ប៉ុន្តែនឹងស្ថិតនៅការធ្វើចត្តាឡីស័ករយៈពេល ១៤ ថ្ងៃ ដើម្បីជាការប្រុងប្រយ័ត្ន ។

គួរបញ្ជាក់ថា ប្រធានសភាពាណិជ្ជកម្មខេត្តសុរិន្ទលោក Veerasak Pisanuwong បានសរសេរបង្ហោះពីលទ្ធផលតេស្តវិជ្ជមាននេះ លើបណ្ដាញសង្គមហ្វេសប៊ុក ហើយលោកបានផ្តល់យោបល់ដល់អ្នកដែលមានទំនាក់ទំនងជិតស្និទ្ធជាមួយលោក ឲ្យធ្វើចត្តាឡីស័កផងដែរ ។

ចាប់តាំងពីគាត់បានចូលទៅក្នុងខេត្តសុរិន្ទ វិញលោក Veerasak បានអនុវត្តតាមវិធានការត្រួតពិនិត្យជំងឺក្នុងមូលដ្ឋាន និងបានធ្វើតេស្តរកឃើញវីរុសនេះនៅមន្ទីរពេទ្យខេត្តសុរិន្ទ ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ ផ្ទុះការរិះគន់ខ្លាំង លោក ប្រាយុទ្ធ ប្រមូលផ្ដុំគ្នាទាំងមិនពាក់ម៉ាស ចូលរួមពិធីសម្ពោធកោះ ភូកេត