ឥណ្ឌូណេស៊ី ត្រៀមខ្លួន ប្រឈមមុខនឹងស្ថានភាពកូវីដ អាក្រក់បំផុត

លោក Luhut Pandjaitan រដ្ឋមន្រ្តីសម្របសម្រួលឥណ្ឌូណេស៊ីបាននិយាយថា ករណីឆ្លងជំងឺកូវីដ-១៩ របស់ប្រទេសឥណ្ឌូណេស៊ី អាចកើនឡើងដល់ ៤០,០០០ ករណីក្នុងមួយថ្ងៃ។

ថ្លែងក្នុងសន្និសីទសារព័ត៌មានរួមគ្នា ជាមួយរដ្ឋមន្រ្តីក្រសួងសុខាភិបាលនិងប្រធានទីភ្នាក់ងារគ្រោះមហន្តរាយ, លោក Pandjaitan បាននិយាយថា រដ្ឋាភិបាលបានត្រៀមខ្លួនរួចហើយសម្រាប់ស្ថានភាពអាក្រក់បំផុត ដែលក្នុងនោះ ករណីឆ្លងនឹងឈានដល់ ៤០,០០០ ករណី។

លោកនិយាយថា “ចំនួននេះអាចបន្តកើនឡើង។ កាលពីម្សិលមិញ យើងមានចំនួន ២៩,០០០ករណី វាអាចនឹងកើនដល់ ៤០,០០០ ករណីឬច្រើនជាងនេះនៅពេលក្រោយ”។

“ដូច្នេះ យើងបានរៀបចំរួចហើយ ដើម្បីប្រឈមមុខនឹងរាល់សេណារីយ៉ូ ទាក់ទងនឹងថ្នាំពេទ្យ អុកស៊ីសែននិងមន្ទីរពេទ្យ។ យើងត្រូវការជំនួយពីបរទេស យើងបានទាក់ទងជាមួយសិង្ហបុរី យើងបានទាក់ទងជាមួយចិន ហើយក៏បានទាក់ទងជាមួយប្រភពផ្សេងទៀតផងដែរ។ តាមពិតយើងបានធ្វើអ្វីៗគ្រប់ជ្រុងជ្រោយអស់ហើយ”។

ប្រទេសឥណ្ឌូណេស៊ី កំពុងតែដោះស្រាយជាមួយនឹងការកើនឡើងនៃករណីឆ្លងជំងឺកូវីដ-១៩ ហើយបានកត់ត្រាជាង ២.៣លានករណីគិតត្រឹមព្រឹកថ្ងៃអង្គារ។ ក្នុងនោះមានអ្នកស្លាប់ចំនួន ៦១,១៤០នាក់៕

ប្រែសម្រួល៖ Vann Vann

ប្រភព៖ CNA

ចុចអាន៖ កូវីដកាន់តែ អាក្រក់ ឥណ្ឌូណេស៊ីប្រឈម កង្វះអុកស៊ីសែន