ក្ដៅៗ ថៃ រកឃើញវីរុសកូវីដបំប្លែងខ្លួនសាហាវៗចំនួន ២ ក្នុងខ្លួនមនុស្សតែមួយ ហើយអាចក្លាយជាវីរុសកូនកាត់

បើយោងតាមក្រសួងសុខាភិបាលសាធារណៈថៃ បានឲ្យដឹងថា កម្មករសំណង់ចំនួន ៧ នាក់នៅប្រទេសថៃ បានឆ្លងវីរុសកូវីដបំប្លែងខ្លួនចំនួន ២ ក្នុងពេលតែមួយ ។

លោកវេជ្ជបណ្ឌិត Supakit Sirilak ប្រធាននាយកដ្ឋានវិទ្យាសាស្ត្រវេជ្ជសាស្ត្រ បាននិយាយថា ការធ្វើតេស្តនៅឯការដ្ឋានសំណង់ដ៏ធំមួយក្នុងទីក្រុងបាងកក បានបង្ហាញថា ពួកគេបានឆ្លងវីរុសបំប្លែងខ្លួនអង់គ្លេស “Alpha” និងវីរុសបំប្លែងខ្លួនឥណ្ឌា “Delta” ។

លោកវេជ្ជបណ្ឌិត Supakit បាននិយាយថា រហូតមកដល់ពេលនេះ ពួកគេនៅតែមានសុខភាពល្អ ហើយមិនបានវិវត្តរោគសញ្ញាណាមួយ គួរឲ្យព្រួយបារម្ភនោះទេ ប៉ុន្តែករណីឆ្លងលាយគ្នានេះ អាចនាំឲ្យមានវីរុសកូនកាត់ ។

ក្នុងចំណោមកម្មករទាំងអស់ចំនួន ១,៧៣៧ នាក់នៅការដ្ឋានសំណង់នោះ មាន ១,៣២៧ នាក់ត្រូវបានធ្វើតេស្តវិជ្ជមាន ហើយក្នុងចំណោមពួកគេ ២៣.៣ ភាគរយបានឆ្លងវីរុសអង់គ្លេស “Alpha” និង ៧៣.៧ ភាគរយឆ្លងវីរុសឥណ្ឌា “Delta” ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ទីបំផុត ថៃ បិទខ្ទប់ទីក្រុងបាងកក និងខេត្តជុំវិញ ក្រោយវីរុសបំប្លែងខ្លួនឥណ្ឌាវាយលុកខ្លាំង