តើលោក ប្រាយុទ្ធ បានធ្វើកិច្ចសហប្រតិបត្តិការអ្វីខ្លះជាមួយកម្ពុជា អំឡុងពេលកាន់តំណែងនាយករដ្ឋមន្ត្រីថៃ?

លោក ប្រាយុទ្ធ ចាន់អូចា បានកាន់តំណែងជានាយករដ្ឋមន្ត្រីថៃ ចាប់ពីឆ្នាំ ២០១៤ ដល់ឆ្នាំ ២០២៣ ហើយក្នុងសម័យរបស់លោក ទំនាក់ទំនងរវាងប្រទេសថៃ និងកម្ពុជា មានភាពរឹងមាំ និងស្ថិរភាពគួរឲ្យកត់សម្គាល់។

ក្នុងអំឡុងពេលនៃការកាន់អំណាចនោះ លោកប្រាយុទ្ធ បានកសាងសមិទ្ធផលនិងបង្កើនកិច្ចសហប្រតិបត្តិការសំខាន់ៗមួយចំនួន ជាមួយប្រទេសកម្ពុជា៖

១. ពង្រឹងទំនាក់ទំនងទ្វេភាគី និងសន្តិភាពតាមព្រំដែន

ដ្បិតលោកប្រាយុទ្ធ ឡើងកាន់អំណាចដោយរដ្ឋប្រហារនៅឆ្នាំ ២០១៤ ក៏ពិតមែន ប៉ុន្តែទំនាក់ទំនងជាមួយកម្ពុជា មានភាពវិជ្ជមានល្អណាស់។ សម្តេចតេជោហ៊ុន សែន ដែលបច្ចុប្បន្នកាន់តំណែងជាប្រធានព្រឹទ្ធសភាកម្ពុជា បានកោតសរសើរលោកប្រាយុទ្ធថា ចំពោះការរក្សាបាននូវទំនាក់ទំនងល្អជាមួយប្រទេសជិតខាង។

លើសពីនេះ ដោយមានការគាំទ្រនិងកិច្ចសហប្រតិបត្តិការល្អរវាងកងទ័ពនៅគ្រប់កម្រិត ធ្វើឲ្យទំនាក់ទំនងយោធារវាងប្រទេសទាំងពីរ កាន់តែរឹងមាំនិងយូរអង្វែង។ កងទ័ពទាំងពីរបានរៀបចំល្បាតរួមគ្នាដើម្បីប្រយុទ្ធប្រឆាំងនឹងការកាប់ឈើខុសច្បាប់ ការជួញដូរគ្រឿងញៀន និងឧក្រិដ្ឋកម្មឆ្លងដែនផ្សេងៗ។

២. ការលើកកម្ពស់ពាណិជ្ជកម្ម និងសេដ្ឋកិច្ច

ពាណិជ្ជកម្មរវាងប្រទេសទាំងពីរបានកើនឡើងយ៉ាងគំហុក។ ជាក់ស្តែង ពាណិជ្ជកម្មទ្វេភាគីបានកើនពីប្រហែល ៣០០ លានដុល្លារអាមេរិក កាលពីជាង២០ឆ្នាំមុន ដល់ជាង ៩ពាន់លានដុល្លារអាមេរិកក្នុងឆ្នាំ២០១៩។

ទន្ទឹមនោះ ការវិនិយោគរបស់ថៃនៅកម្ពុជាក៏កើនឡើងផងដែរ ដែលកត្តានេះបានរួមចំណែកវិជ្ជមានដល់សេដ្ឋកិច្ចកម្ពុជា។ មិនត្រឹមប៉ុណ្ណឹង សេដ្ឋកិច្ចថៃក៏ទទួលបានអត្ថប្រយោជន៍យ៉ាងច្រើនពីកម្លាំងពលកម្មកម្ពុជា និងកិច្ចសហប្រតិបត្តិការសេដ្ឋកិច្ចផងដែរ។

ក្រៅពីនេះ មានការឯកភាពគ្នាជំរុញការអភិវឌ្ឍតំបន់សេដ្ឋកិច្ចពិសេសនៅតាមបណ្តោយព្រំដែន ដើម្បីសម្រួលដល់ចលនាទំនិញនិងជំរុញកំណើន។

៣. ការតភ្ជាប់ហេដ្ឋារចនាសម្ព័ន្ធ

ស្ពានមិត្តភាពកម្ពុជា-ថៃ (ស្ទឹងបត់-បានណងអៀន) ជាស្ពានតភ្ជាប់ខេត្តស្រះកែវរបស់ថៃ ជាមួយក្រុងប៉ោយប៉ែត ខេត្តបន្ទាយមានជ័យរបស់កម្ពុជា។ ស្ពាននេះត្រូវបានសម្ពោធជាផ្លូវការនៅឆ្នាំ ២០១៩ ដោយលោកប្រាយុទ្ធ និងសម្តេចតេជោហ៊ុន សែនផ្ទាល់ ដើម្បីសម្រួលដល់ការដឹកជញ្ជូនទំនិញ និងប្រជាពលរដ្ឋឆ្លងកាត់ព្រំដែន។

ក៏មានការបើកឡើងវិញនូវសេវាផ្លូវដែកដែលភ្ជាប់សហគមន៍ថៃ និងកម្ពុជាផងដែរ។ ប្រទេសថៃបានផ្តល់ក្បាលរថភ្លើងមួយគ្រឿងដល់កម្ពុជា ដើម្បីដឹកជញ្ជូនទំនិញនិងភ្ញៀវទេសចររវាងប្រទេសទាំងពីរ។

លើសពីនេះ ប្រទេសទាំងពីរមានការឯកភាពគ្នាក្នុងការដំឡើងកម្រិតច្រកព្រំដែន និងបើកច្រកបន្ថែមទៀត ដើម្បីសម្រួលដល់ការធ្វើដំណើរ និងពាណិជ្ជកម្ម។

៤. កិច្ចសហប្រតិបត្តិការលើវិស័យផ្សេងៗ

• សុខភាពសាធារណៈ៖ ពង្រឹងកិច្ចសហប្រតិបត្តិការ ជាពិសេសនៅតាមតំបន់ព្រំដែន រួមទាំងការសម្រួលប្រព័ន្ធបញ្ជូនអ្នកជំងឺឆ្លងដែន និងការរៀបចំមន្ទីរពេទ្យផងដែរ។
• ប្រយុទ្ធប្រឆាំងនឹងការជួញដូរមនុស្ស: មានការប្តេជ្ញាចិត្តយ៉ាងមុតមាំក្នុងការអនុវត្តអនុស្សរណៈនៃការយោគយល់គ្នា (MoU) ដែលបានចុះហត្ថលេខាជាមួយកម្ពុជា។
• ទេសចរណ៍: ថៃ និងកម្ពុជាបានព្រមព្រៀងលើផែនការសហប្រតិបត្តិការរួមគ្នាក្នុងវិស័យទេសចរណ៍។
• ការឆ្លើយតបនឹងវិបត្តិ: ក្នុងអំឡុងពេលជំងឺរាតត្បាតកូវីដ-១៩ ប្រទេសទាំងពីរបានធ្វើការរួមគ្នាដើម្បីកាត់បន្ថយផលប៉ះពាល់លើសេដ្ឋកិច្ច និងសង្គមរៀងៗខ្លួន៕

អត្ថបទ៖ សុខ សុវណ្ណ

ចុចអាន៖ លោកស្រី ផែនថងថាន៖ ខ្ញុំ​នឹង​ប្រើ​ពេល១៥ថ្ងៃ​ពន្យល់​តុលាការ​ថា​ខ្ញុំ​ធ្វើ​ដើម្បី​ជាតិ​លើស​ពី១០០%