វីរុសបំប្លែងខ្លួនឥណ្ឌា Delta រាលដាលកាន់តែងាយស្រួលដូចជំងឺអុតស្វាយ

ដោយដកស្រង់ឯកសារផ្ទៃក្នុងពីមជ្ឈមណ្ឌលគ្រប់គ្រង និងបង្ការជំងឺអាមេរិក (CDC) កាសែត The Washington Post បានរាយការណ៍កាលពីថ្ងៃសុក្រថា វីរុសបំប្លែងខ្លួនឥណ្ឌា “Delta” កំពុងរាលដាលកាន់តែងាយស្រួលដូចជំងឺអុតស្វាយ ខណៈដែលមនុស្សចាក់វ៉ាក់សាំងពេញ ២ ដូសក៏ចម្លងវីរុសនេះបានផងដែរ ។

យោងតាមឯកសារនេះបានឲ្យដឹងថា ការចម្លងនៃវីរុសបំប្លែងខ្លួនឥណ្ឌា “Delta” គឺស្ទើរតែខ្ពស់ដូចជំងឺអុតស្វាយ ដោយជាមធ្យមមនុស្សម្នាក់អាចចម្លងដល់មនុស្ស ៨ ឬ ៩ នាក់ផ្សេងទៀត ។

ឯកសារនោះបន្ថែមទៀតថា មនុស្សដែលទទួលការចាក់វ៉ាក់សាំងពេញ ២ ដូសអាចចម្លងវីរុសទៅមនុស្សដែលមិនបានចាក់វ៉ាក់សាំង ដោយគ្រាន់តែអ្នកចាក់វ៉ាក់សាំងផ្តមានការការពារច្រើនប្រឆាំងនឹងវីរុសឆ្លងនេះ ។

ទន្ទឹមនោះ CDC បានអំពាវនាវជាសកលឲ្យប្រជាជនពាក់ម៉ាស និងចាក់វ៉ាក់សាំង ព្រោះវាជាឧបករណ៍ដ៏ល្អបំផុតប្រឆាំងវីរុសបំប្លែងខ្លួនឥណ្ឌា “Delta” ។

បច្ចុប្បន្ន សហរដ្ឋអាមេរិកកំពុងងើបឡើងវិញ លើករណីឆ្លងជំងឺកូវីដ ១៩ ដោយក្នុងនោះវីរុសបំប្លែងខ្លួនឥណ្ឌា “Delta” មានចំនួនជាង ៨០ ភាគរយនៃករណីឆ្លងថ្មីគិតត្រឹមថ្ងៃទី ២០ ខែកក្កដា ។

គួរបញ្ជាក់ថា មនុស្សពេញវ័យប្រហែល ៧០ ភាគរយ ឬ ១៧៨ លាននាក់នៅអាមេរិក បានទទួលការចាក់វ៉ាក់សាំងការពារជំងឺកូវីដ ១៩ យ៉ាងហោចណាស់មួយដូស និង ៦០ ភាគរយ ឬ ១៥៥ លាននាក់ បានចាក់វ៉ាក់សាំងពេញ ២ ដូស ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ វីរុសបំប្លែងខ្លួនឥណ្ឌា Delta កំពុងរាលដាលពាសពេញទ្វីបអាហ្វ្រិក ខណៈការចាក់វ៉ាក់សាំងនៅតែទាប