ចិន រកឃើញ អ្នកឆ្លងកូវីដក្នុងសហគមន៍ច្រើនបំផុតមិនធ្លាប់មាន ចាប់តាំងពីខែមករា ខណៈ Delta កំពុងវាយលុក

នៅថ្ងៃពុធទី ០៤ ខែសីហានេះ ប្រទេសចិនបានរាយការណ៍ថាមានករណីឆ្លងជំងឺកូវីដ -១៩ ក្នុងសហគមន៍ច្រើនបំផុតចាប់តាំងពីខែមករាមក ខណៈទីក្រុងមួយចំនួន បានបង្កើនការរឹតត្បិត កាត់បន្ថយជើងហោះហើរនិងបង្កើនការធ្វើតេស្ត ដើម្បីទប់ទល់នឹងវីរុសបំប្លែងខ្លួន Delta។

ចាប់តាំងពីចុងខែកក្កដាមក វីរុសឆ្លងខ្លាំង Delta ត្រូវបានគេរកឃើញនៅក្នុងទីក្រុងចិនជាច្រើន រាប់បញ្ចូលទាំងរដ្ឋធានីប៉េកាំងនិងទីក្រុងអ៊ូហាន ដែលជាកន្លែងមេរោគកូវីដ ផ្ទុះឡើងកាលពីចុងឆ្នាំ ២០១៩ ផងដែរ។

ប្រទេសចិន បានរាយការណ៍ពីការឆ្លង កូវីដក្នុងសហគមន៍ចំនួន ៧១ ករណីកាលពីថ្ងៃទី ៣ ខែសីហា ដែលនេះជាចំនួនឆ្លងប្រចាំថ្ងៃខ្ពស់បំផុត គិតចាប់តាំងពីថ្ងៃទី ៣០ ខែមករាមក ខណៈចំនួននៃការឆ្លងបានកើនឡើង ៥ ថ្ងៃជាប់ៗគ្នា គិតចាប់តាំងពីថ្ងៃទី ៣០ ខែកក្កដាមក។

ទីក្រុងភាគច្រើន មិនទាន់ដាក់ចេញនូវការបិទខ្ទប់តឹងរ៉ឹងទេ ប៉ុន្តែទីក្រុងមួយចំនួនបានដាក់កម្រិតលើចលនាខ្លះ។

ទីក្រុង Nanjing និង Yangzhou នៅខេត្ត Jiangsu ភាគខាងកើត ដែលជាកន្លែងករណីភាគច្រើននៅក្នុងប្រទេសចិនត្រូវបានគេរាយការណ៍ចាប់តាំងពីថ្ងៃទី២០ខែកក្កដាមក បានផ្អាកជើងហោះហើរក្នុងស្រុក រថយន្តក្រុងដឹកអ្នកដំណើរចម្ងាយឆ្ងាយ តាក់ស៊ីនិងសេវាកម្មធ្វើដំណើរនានាចេញនិងចូលទីក្រុង។

ចំណែកទីក្រុង Zhengzhou និង Jingzhou បានបិទខ្ទប់សង្កាត់មួយចំនួន និងដាក់កំហិតលើការដឹកជញ្ជូនសាធារណៈ នៅក្នុងតំបន់ដែលចាត់ទុកថាមានហានិភ័យខ្ពស់។

គិតត្រឹមថ្ងៃអង្គារទី០៣ខែសីហា ប្រទេសចិន​ បានកត់ត្រាការឆ្លងកូវីដសរុប ៩៣,២៨៩ករណី ខណៈចំនួនអ្នកស្លាប់មិនប្រែប្រួលទេ ពោលគឺនៅតែមានចំនួន ៤,៦៣៦នាក់៕

ប្រែសម្រួល៖ Vann Vann

ប្រភព៖ CNA

ចុចអាន៖ ធ្ងន់ធ្ងរហើយ វីរុសបំប្លែងខ្លួនឥណ្ឌា Delta អុកឡុកដល់ទីក្រុងអ៊ូហាន ហើយ