ធ្ងន់ធ្ងរហើយ វីរុសបំប្លែងខ្លួនឥណ្ឌា Delta អុកឡុកដល់ទីក្រុងអ៊ូហាន

ក្រុមមន្រ្តីរដ្ឋាភិបាលក្នុងតំបន់ បាននិយាយនៅសន្និសីទសារព័ត៌មានមួយនៅថ្ងៃពុធនេះថា ការឆ្លងជំងឺកូវីដ ១៩ ជាចង្កោមចុងក្រោយបង្អស់នៅក្នុងទីក្រុងអ៊ូហាន ខេត្ត Hubei ភាគកណ្តាលប្រទេសចិន ត្រូវបានផ្សារភ្ជាប់ទៅនឹងវីរុសបំប្លែងខ្លួនឥណ្ឌា “Delta” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងអ៊ូហានកាលពីថ្ងៃចន្ទបានរាយការណ៍ពីករណីវិជ្ជមានចំនួន ៧ ករណី ក្នុងចំណោមពលករចំណាកស្រុក ។ ការធ្វើហ្សែននៃករណីចំនួន ២ ក្នុងចំណោម ៧ ករណីនេះបានបញ្ចប់ ហើយបានបង្ហាញពីភាពស្រដៀងគ្នាខ្ពស់ ចំពោះករណីនៃវីរុសបំប្លែងខ្លួនឥណ្ឌា “Delta” ដែលទើបតែរកឃើញថ្មីៗនេះនៅខេត្ត Jiangsu ភាគខាងកើតប្រទេសចិន ។

ចាប់តាំងពីថ្ងៃទី ៣១ ខែកក្កដា ខេត្ត Hubei បានកត់ត្រាករណីឆ្លងជំងឺកូវីដ ១៩ ក្នុងសហគមន៍ចំនួន ១៥ ករណី ដែលក្នុងនោះ ១២ ករណីត្រូវបានរកឃើញនៅក្នុងទីក្រុងអ៊ូហាន ។

ទន្ទឹមនោះ នៅក្នុងសន្និសីទសារព័ត៌មានមួយផ្សេងទៀតកាលពីថ្ងៃអង្គារ រដ្ឋាភិបាលខេត្ត Hubei បានបង្ហាញថា ករណីឆ្លងក្នុងសហគមន៍នេះ គឺទាក់ទងនឹងការឆ្លងនៅក្នុងខេត្ត Jiangsu ដោយទៅយោងតាមការពិនិត្យរោគរាតត្បាត និងលទ្ធផលតេស្តតាមហ្សែន ។

ក្រោយរងគ្រោះខ្លាំងដោយកូវីដ ១៩ ទីក្រុងអ៊ូហានមិនបានរាយការណ៍ពីករណីឆ្លងក្នុងសហគមន៍រយៈពេលជាងមួយឆ្នាំមុនគិតត្រឹមថ្ងៃចន្ទ ខណៈទីក្រុងចិនមួយនេះ បានចាប់ផ្តើមយុទ្ធនាការធ្វើតេស្តរកវីរុសនៅទូទាំងទីក្រុងកាលពីថ្ងៃអង្គារ បន្ទាប់ពីការផ្ទុះឡើងជាថ្មី ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ អ៊ូហាន ត្រៀមធ្វើតេស្តប្រជាជនក្នុងទីក្រុងទាំងអស់ ខណៈកូវីដត្រឡប់មកវិញ