ស្ត្រីកូឡុំប៊ី ២នាក់លាក់គ្រឿងញៀន ១,០០០ដូសក្នុងប្រដាប់ភេទ ត្រូវប៉ូលិសចាប់បាន បន្ទាប់ពីឃើញ ដើរចម្លែក

ស្ត្រីជនជាតិកូឡុំប៊ីពីរនាក់ ត្រូវបានចាប់ខ្លួនពីបទរត់ពន្ធកូកាអ៊ីន លាក់នៅក្នុងប្រដាប់ភេទ បន្ទាប់ពីពួកគេ ត្រូវបានប៉ូលិសប្រទះឃើញដើរខុសប្លែកពីធម្មតា។

អ្នកទាំងពីរ ត្រូវចាប់បាននៅអាកាសយានដ្ឋានអន្តរជាតិ Rafael Nunez ក្នុងទីក្រុង Cartagena ខណៈពេលព្យាយាមឡើងយន្តហោះទៅកាន់កោះ San Andres។

ប៉ូលិសនិយាយថា ពួកគេមានថ្នាំញៀនកូកាអ៊ីនចំនួន ១,០០០ ដូសនិងថ្នាំ Benzodiazepines ចំនួន៦០គ្រាប់​ ដែលរុំនៅក្នុងកញ្ចប់ស្រោបជ័រ ហើយដាក់ចូលទៅក្នុងប្រដាប់ភេទរបស់ពួកគេ។

ប៉ូលិសបន្តថា ស្ត្រីទាំងពីរ មានអារម្មណ៍ភិតភ័យ ហើយធ្វើចលនាចម្លែក ដែលនាំឲ្យពួកគេត្រូវចាប់ខ្លួនបានត្រឹមតែប៉ុន្មាននាទីប៉ុណ្ណោះ មុនពេលឡើងយន្តហោះ។

អ្នកនាំពាក្យរបស់ប៉ូលិសក្រុង Cartagena បានឲ្យដឹងថា “អង្គភាព បានធ្វើការត្រួតពិនិត្យយ៉ាងល្អិតល្អន់លើវ៉ាលិសរបស់អ្នកដំណើរ ដែលឡើងជិះយន្តហោះក្នុងស្រុក និងថ្នាំគ្រវី Rivotril ចំនួន ៦០ បន្ទះក៏ត្រូវបានរកឃើញនៅក្នុងនោះផងដែរ”។

យោងតាមប្រភពពីសមត្ថកិច្ច, ស្ត្រីទាំងពីរនាក់ ត្រូវបានគេនាំទៅប៉ុស្តិ៍ប៉ូលិសភ្លាមៗ ហើយពួកគេបានស្ម័គ្រចិត្តដកកញ្ចប់ចេញពីប្រដាប់ភេទរបស់ពួកគេ។

ប៉ូលិសបានបន្ថែមថា អ្នកជំនាញប្រឆាំងគ្រឿងញៀន ត្រូវបានកោះហៅដើម្បីធ្វើតេស្តរកសារធាតុញៀន ហើយពួកគេពិតជាបានបង្ហាញថា វាជាសារធាតុខុសច្បាប់ពិតមែន។

ស្ត្រីទាំងពីរនាក់ ប្រឈមមុខនឹងការចោទប្រកាន់ពីបទផលិតគ្រឿងញៀន និងជួញដូរគ្រឿងញៀនខណៈការស៊ើបអង្កេតកំពុងបន្ត៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ មនុស្ស ៤ នាក់ ក្លែង ធ្វើជា នគរបាល ប្រឆាំង បទល្មើស គ្រឿងញៀន ជម្រិត ទារប្រាក់ ពី ពលរដ្ឋ ត្រូវ កម្លាំង សមត្ថកិច្ច បង្ក្រាប