ព័ត៌មានអន្ដរជាតិ

ឥណ្ឌូណេស៊ីឈប់ធ្វើតេស្តព្រហ្មចារីលើនារីដាក់ពាក្យចូលបម្រើកងទ័ពហើយ

បានផុស

៥ years មុន

នៅ

ថ្ងៃពុធ ១១ សីហា ២០២១

ដោយ

កងទ័ពឥណ្ឌូណេស៊ីបានឈប់ការអនុវត្តលើការធ្វើតេស្តព្រហ្មចារីដ៏ចម្រូងចម្រាសលើស្ត្រីភេទដែលដាក់ពាក្យចូលធ្វើបម្រើកងទ័ព។ នេះបើយោងតាមប្រធានបុគ្គលិករបស់កងទ័ពឥណ្ឌូណេស៊ីបានឲ្យដឹង ដែលចំណាត់ការនេះទទួលបានស្វាគមន៍ពីសកម្មជនដែលបានប្រឹងប្រែងធ្វើយុទ្ធនាការណ៍ប្រឆាំងជាយូរមកហើយ។

យោងតាមអង្គការឃ្លាំមើលសិទ្ធិមនុស្ស(HRW)ដែលមានមូលដ្ឋាននៅទីក្រុងញូវយ៉កដែលបានធ្វើការស៊ើបអង្កេតតាំងពីឆ្នាំ២០១៤ជុំវិញករណីនេះ និងនៅឆ្នាំ២០១៧បានធ្វើការអំពាវនាវជាថ្មីឲ្យបញ្ឈប់ការអនុវត្តបែបនេះបាននិយាយថា ៖«ការធ្វើតេស្តម្រាមដៃពីរដែលក្រុមវេជ្ជបណ្ឌិតពិនិត្យទៅលើសន្ទះព្រហ្មចារីរបស់ស្ត្រីភេទដើម្បីជ្រើសរើសនារីចូលបម្រើកងទ័ព និងកំណត់ព្រហ្មចារីរបស់ពួកគេ មានលក្ខណៈជាប្រព័ន្ធ រំលោភបំពាន និងឃោឃៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លងមក ទាហានបាននិយាយថា ការធ្វើតេស្តពិតជាសំខាន់ក្នុងការកំណត់សីលធម៌ក្នុងការជ្រើសរើស។ អង្គការសុខភាពពិភពលោកបាននិយាយថា ពួកគេគ្មានសុពលភាពវិទ្យាសាស្ត្រទេ ហើយការលេចចេញនៃសន្ទះព្រហ្មចារីមិនមែនជាសូចនាករនៃការរួមរ័ក្សគួរឲ្យទុកចិត្តបានទេ។

លោក Andika Perkasa ប្រធានបុគ្គលិកកងទ័ពឥណ្ឌូណេស៊ីបាននិយាយកាលពីថ្ងៃអង្គារ៍ម្សិលមិញថា ការធ្វើតេស្តបែបនេះលែងមានទៀតហើយនៅក្នុងការជ្រើសរើសកងទ័ព។

លោកថា ៖«ថាតើសន្ទះព្រហ្មចារីបានរហែក ឬប្រេះដាច់ខ្លះជាផ្នែកនៃការពិនិត្យ…ឥឡូវនេះមិនមានទៀតទេ»។ ការលើកឡើងរបស់លោកត្រូវបានបញ្ជាក់ដោយអ្នកនាំពាក្យកងទ័ពម្នាក់។

កាលពីសប្តាហ៍មុន លោក Andika បាននិយាយថា ដំណើរជ្រើសរើសកងទ័ពសម្រាប់បុរស និងស្ត្រីត្រូវតែស្មើភាពគ្នា។

លោក Julius Widjojono អ្នកនាំពាក្យយោធាបាននិយាយនៅថ្ងៃពុធនេះថា កងទ័ពជើងទឹកបានតេស្តផ្ទៃពោះ ប៉ុន្តែមិនបានធ្វើតេស្តជាក់លាក់ពីព្រហ្មចារីឡើយ។ លោកបន្ថែមថា ៖«ទាំងបុរស និងស្ត្រីត្រូវបានអនុវត្តលើការត្រួតពិនិត្យដូចគ្នា»។

លោក Indan Gilang អ្នកនាំពាក្យកងទ័ពជើងអាកាសបាននិយាយថា ការធ្វើតេស្តការបន្តពូជរបស់ស្ត្រីត្រូវបានធ្វើឡើងដើម្បីពិនិត្យរកដុំគិស ឬផលវិបាកផ្សេងៗទៀតដែលអាចធ្វើឲ្យប៉ះពាល់ដល់សមត្ថភាពក្នុងការបម្រើកងទព។ ការធ្វើតេស្តព្រហ្មចារីមិនមាននៅក្នុងប្រជុំសព្ទបច្ចេកទេសរបស់កងកម្លាំងទ័ពទេ។

ក្រុមសិទ្ធិមនុស្សបានស្វាគមន៍ចំពោះសេចក្តីប្រកាសដែលកងទ័ពបញ្ឈប់ការអនុវត្ត។

អ្នកស្រី Andy Yentriyani ប្រធានគណៈកម្មការជាតិស្តីពីហិង្សាប្រឆាំងលើស្ត្រីភេទបាននិយាយថា ៖«មិនមានតម្រូវការសម្រាប់ការធ្វើតេស្តឡើយ»។

លោក Andreas Harsono អ្នកស្រាវជ្រាវឥណ្ឌូណេស៊ីនៅ HRW បាននិយាយថា នេះជារឿងត្រឹមត្រូវដែលត្រូវធ្វើ។ លោកបន្ថែមថា ៖«ការអនុវត្តបែបនេះគឺថោកទាប រើសរើស និងប៉ះទង្គិចផ្លូវចិត្ត»។

លោកថា អង្គការឃ្លាំមើលសិទ្ធិមនុស្ស HRW បានសាកសួរទាហានស្រីជាង១០០នាក់ដែលបានធ្លងកាត់ការធ្វើតេស្តក្នុងការជ្រើសរើសចូលបម្រើកងទ័ព មានម្នាក់បានទម្លាយឲ្យដឹងថា គាត់ត្រូវបានគេធ្វើតេស្តនៅឆ្នាំ១៩៦៥៕

ប្រែសម្រួល៖ វីរបុត្រ
ប្រភព៖ reuters

Related Topics:ប្រទេសឥណ្ឌូណេស៊ី