អ្នកជំងឺមហារីកជិត ៩០%មានកម្រិតអង់ទីគ័រខ្ពស់ប្រឆាំងកូវីដ ក្រោយចាក់វ៉ាក់សាំងប្រភេទនេះ

អ្នកជំងឺមហារីកអាចបង្កើតកម្រិតអង្គបដិប្រាណ (អង់ទីគ័រ) ខ្ពស់ប្រឆាំងនឹងវីរុសកូវីដ-១៩យ៉ាងហោច ៤ខែ បន្ទាប់ពីចាក់វ៉ាក់សាំង Pfizer លើកទី២រួចរាល់។ នេះ​បើតាមទិន្នន័យស្រាវជ្រាវថ្មីមួយដែលចុះផ្សាយដោយ Daily Mail។

ក្រុមអ្នកស្រាវជ្រាវមកពីមជ្ឈមណ្ឌល Rabin Medical ប្រទេសអ៊ីស្រាអែលបានប្រៀបធៀបប្រសិទ្ធភាពវ៉ាក់សាំងទៅលើក្រុមអ្នកជំងឺមហារីកទៅនឹងអ្នកដែលគ្មានជំងឺនេះ។

ក្រុមស្រាវជ្រាវរកឃើញថា អ្នកជំងឺមហារីក ៨៧ភាគរយអាចបង្កើតអង់ទីគ័រក្នុងកម្រិតខ្ពស់ បានដល់ ៤ខែ ក្រោយចាក់ដូសទី២។ ការរកឃើញនេះបង្ហាញថា មនុស្សដែលប្រព័ន្ធការពាររាងកាយខ្សោយដោយសារជំងឺមហារីកនឹងមិនមានហានិភ័យក្នុងកាឆ្លងវីរុសកូវីដ-១៩ នោះទេ។

ការសិក្សាដែលបោះពុម្ពផ្សាយនៅក្នុងទស្សនាវដ្ដី JAMA Oncology ក្រុមអ្នកស្រាវជ្រាវបានប្រមូលអ្នកចូលរួមចំនួន ៩៥នាក់ដែលមានជំងឺមហារីក។ ក្នុងនោះមនុស្ស ៨៣នាក់ក្នុងចំណោមពួកគេ ឬស្មើ ៨៧ភាគរយមានកម្រិតអង់ទីគ័រខ្លាំង អាចការពារប្រឆាំងនឹងវីរុសកូវីដ-១៩ ក្រោយចាក់វ៉ាក់សាំង។ អ្នកចូលរួមទាំងអស់ត្រូវបានវាស់កម្រិតអង់ទីគ័រ បន្ទាប់ពីទទួលបានវ៉ាក់សាំង Pfizer-BioNTech លើកទី ២។ លទ្ធផលរកឃើញថា រយៈពេលប្រមាណ ៥.៥ សប្ដាហ៍បន្ទាប់ពីចាក់វ៉ាក់សាំងដូសទី២ និងរយៈពេល ៤ខែក្រោយមក អង់ទីគ័ររបស់អ្នកជំងឺមហារីកនៅតែមានកម្រិតខ្ពស់ដដែល។

ការរកឃើញនេះ បញ្ជាក់ច្បាស់ៗថា វ៉ាក់សាំងមានប្រសិទ្ធភាពចំពោះមនុស្សគ្រប់រូប និងសូម្បីតែអ្នកជំងឺមហារីកក៏ដោយ៕

ប្រែសម្រួល៖ សន្យា

ចុចអាន៖ វ៉ាក់សាំង Pfizer ទំនងបង្កហានិភ័យរលាកសាច់ដុំបេះដូងចំពោះក្មេងប្រុសជំទង់

ចុចអាន៖ អ្នកជំនាញថា ការចាក់វ៉ាក់សាំងដូសទី ៣ ដល់អ្នកមានប្រព័ន្ធភាពស៊ាំចុះខ្សោយគួរតែធ្វើឲ្យបានឆាប់