ចលនាតស៊ូប្រដាប់អាវុធ អាហ្វហ្គានីស្ថាន កំពុងជីកលេណដ្ឋានត្រៀមទប់ទល់ការវាយប្រហាររបស់តាលីបង់

ប៉ុន្មានថ្ងៃ បន្ទាប់ពីក្រុមសកម្មប្រយុទ្ធតាលីបង់អាចដណ្តើមបានទីក្រុងកាប៊ុល ដោយគ្មានការប្រយុទ្ធគ្នា  យោងតាមសារព័ត៌មាន Khaama Press ដែលមានមូលដ្ឋាននៅអាហ្វហ្គានីស្ថានបាននិយាយថា យុទ្ធជនមកពីចលនាតស៊ូនៃរណសិរ្សតស៊ូជាតិ (NRF) ឥឡូវនេះកំពុងជីកលេណដ្ឋានមួយដើម្បីការពារខេត្តជ្រលងភ្នំ Panjshir ។

យោងតាមរបាយការណ៍បានឲ្យដឹងថា “រណសិរ្ស NRF បានបំពាក់កាំភ្លើងយន្ត កាំភ្លើងត្បាល់ និងប៉ុស្តិ៍ត្រួតពិនិត្យដែលការពារដោយបាវខ្សាច់ ក្នុងការស្មានទុកជាមុនថានឹងមានការវាយប្រហាររបស់តាលីបង់លើបន្ទាយរបស់ពួកគេ” ។

ការប្រឈមមុខដាក់គ្នារវាងតាលីបង់ និងរណសិរ្ស NRF កាន់តែខ្លាំងឡើងកាលពីថ្ងៃអាទិត្យ នៅពេលដែលក្រុមតាលីបង់បានទុកពេលឲ្យមេដឹកនាំរណសិរ្ស NRF លោក Ahmad Massoud កូនប្រុសរបស់អតីតមេដឹកនាំប្រឆាំងតាលីបង់លោក Ahmad Shah Massoud បួនម៉ោងដើម្បីចុះចាញ់ ។

ជាការឆ្លើយតបលោក Massoud បាននិយាយថា រណសិរ្ស NRF នៅជ្រលងភ្នំ Panjshir នឹងមិនចុះចាញ់ឡើយ ហើយអ្នកស្រុកបានត្រៀមខ្លួនដើម្បីប្រយុទ្ធ ប៉ុន្តែគាត់មិនបានច្រានចោលការចរចាសន្តិភាពណាមួយឡើយ ។

ដោយដកស្រង់ប្រភពមួយនៅតាលីបង់ ទីភ្នាក់ងារសារព័ត៌មាន AFP បានរាយការណ៍ថា យុទ្ធជនតាលីបង់ជាច្រើនរយនាក់កំពុងធ្វើដំណើរឆ្ពោះទៅជ្រលងភ្នំ Panjshir ខណៈរណសិរ្ស NRF បានរាយការណ៍ថា កងទ័ពប្រហែល ៦ ពាន់នាក់កំពុងស្វែងរកការគាំទ្រពីអន្តរជាតិ ដើម្បីទប់ទល់ក្រុមតាលីបង់ ។

នៅថ្ងៃទី ១៨ ខែសីហា លោក Massoud បានសរសេរសារមួយទៅកាន់កាសែត Washington Post អំពីការសុំជំនួយពីអន្តរជាតិ ។ នៅក្នុងការអំពាវនាវរបស់គាត់ទៅកាន់ប្រទេសទាំងអស់ រួមទាំងសហរដ្ឋអាមេរិក និងចក្រភពអង់គ្លេស លោក Massoud បានសរសេរថា តាលីបង់មិនត្រឹមតែជាបញ្ហាសម្រាប់អាហ្វហ្គានីស្ថាននោះទេ ហើយប្រទេសអាហ្វហ្គានីស្ថានដែលស្ថិតក្រោមក្រុមតាលីបង់ វានឹងក្លាយជាចំណុចសូន្យនៃអំពើភេរវកម្មឥស្លាមជ្រុលនិយម ។

គួរបញ្ជាក់ថា ទីក្រុងកាប៊ុលបានធ្លាក់ទៅលើដៃក្រុមតាលីបង់កាលពីថ្ងៃទី ១៥ ខែសីហា បន្ទាប់ពីប្រធានាធិបតីលោក Mohammad Ashraf Ghani បានភៀសខ្លួនចេញពីប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ចលនាតស៊ូប្រដាប់អាវុធ អាហ្វហ្គានីស្ថាន បដិសេធមិនចុះចាញ់ តាលីបង់ ហើយព្រមានសង្គ្រាមនឹងផ្ទុះឡើង