តាលីបង់ អនុញ្ញាតឲ្យអ្នកមានហានិភ័យចាកចេញពី អាហ្វហ្គានីស្ថាន បន្ទាប់ពីថ្ងៃទី ៣១ សីហា

រដ្ឋមន្ត្រីការបរទេសអាមេរិកលោក Antony Blinken បាននិយាយកាលពីថ្ងៃពុធថា ពួកតាលីបង់បានធ្វើការប្តេជ្ញាអនុញ្ញាតឲ្យពលរដ្ឋអាមេរិក និងជនជាតិអាហ្វហ្កានីដែលមានហានិភ័យ ចាកចេញពីប្រទេស បន្ទាប់ពីថ្ងៃផុតកំណត់នៃការជម្លៀសនៅថ្ងៃទី ៣១ ខែសីហា ។

លោកបានសង្កត់ធ្ងន់ថា កិច្ចខិតខំប្រឹងប្រែងរបស់អាមេរិក ដើម្បីជួយមនុស្សដែលចង់ចាកចេញ នឹងមិនបញ្ចប់នៅថ្ងៃកាលបរិច្ឆេទនេះនោះទេ ។

រដ្ឋមន្ត្រីរូបនេះបាននិយាយទៀតថា រដ្ឋបាលអាមេរិកកំពុងខិតខំប្រឹងប្រែងយ៉ាងខ្លាំង ដើម្បីតាមរកជនជាតិអាមេរិកទាំងនោះ ដែលនៅតែមាននៅក្នុងប្រទេសអាហ្វហ្គានីស្ថាន ។

កលោក Blinken បញ្ជាក់ថា រហូតមកដល់ពេលនេះ សហរដ្ឋអាមេរិកបានជម្លៀសពលរដ្ឋអាមេរិកចំនួន ៤,៥០០ នាក់ក្នុងចំណោមជនជាតិអាមេរិកចំនួន ៦ ពាន់នាក់ដែលត្រូវបានកំណត់អត្តសញ្ញាណនៅក្នុងប្រទេសអាហ្វហ្គានីស្ថាន ខណៈប្រជាជនអាមេរិកប្រមាណ ១,៥០០ នាក់កំពុងរង់ចាំការជម្លៀសចេញពីប្រទេសដែលហែកហួរដោយសង្គ្រាមមួយនេះ ។

ស្របពេលជាមួយគ្នានេះ លោក Blinken បាននិយាយនៅក្នុងសន្និសីទមួយថា “ចាប់តាំងពីថ្ងៃទី ១៤ ខែសីហាមក មនុស្សជាង ៨២,៣០០ នាក់ត្រូវបានហោះចេញពីទីក្រុងកាប៊ុលដោយសុវត្ថិភាព ខណៈអាទិភាពចម្បងរបស់យើង គឺការជម្លៀសពលរដ្ឋអាមេរិក” ៕

ប្រែសម្រួលដោយ ៖ ជីវ័ន្ត

ប្រភព ៖ India TV

ចុចអាន ៖ មកដឹងពីទំហំសព្វាវុធ រថពាសដែក និងយន្តហោះរបស់អាមេរិក ដែលធ្លាក់ដល់ដៃក្រុម តាលីបង់