លោក ចូ បៃដិន ព្រមានថា ការវាយប្រហារមួយទៀតនៅ ព្រលានយន្តហោះក្រុង កាប៊ុល ជិតកើតឡើងហើយ

ប្រធានាធិបតីអាមេរិក លោក ចូ បៃដិន បានព្រមានថា ការវាយប្រហារមួយទៀតនៅអាកាសយានដ្ឋានក្រុងកាប៊ុល ជិតកើតឡើងហើយ បន្ទាប់ពីមេបញ្ជាការយោធាបានប្រាប់លោកថា វាអាចកើតឡើងនៅព្រឹកថ្ងៃអាទិត្យ (ម៉ោងនៅអាមេរិក)។

ការព្រមាននេះបានធ្វើឡើង ស្របពេលសហរដ្ឋអាមេរិក កំពុងបន្តការជម្លៀស។

មនុស្សប្រហែល ១៧០ នាក់ បានស្លាប់បន្ទាប់ពីអ្នកបំផ្ទុះគ្រាប់បែកអត្តឃាត បានកំណត់គោលដៅលើព្រលានយន្តហោះ កាលពីថ្ងៃព្រហស្បតិ៍។

ក្រុម IS-K បានអះអាងទទួលខុសត្រូវចំពោះ ការវាយប្រហារនេះ។

ជាការសងសឹក សហរដ្ឋអាមេរិកបានធ្វើការវាយប្រហារ ដោយយន្តហោះគ្មានមនុស្សបើក នៅភាគខាងកើតប្រទេសអាហ្វហ្គានីស្ថានកាលពីល្ងាចថ្ងៃសុក្រ ដោយបានសម្លាប់សមាជិកកំពូលពីរនាក់របស់ក្រុម IS-K ឬគេស្គាល់ថាជាក្រុមរដ្ឋឥស្លាម (IS) នៅខេត្ត Khorasan។

សមាជិកទាំងពីរ ត្រូវបានគេជឿថា ជាអ្នករៀបចំផែនការនិងជាអ្នកសម្របសម្រួលបំផ្ទុះគ្រាប់បែក។

លោក បៃដិន បាននិយាយនៅក្នុងសេចក្តីថ្លែងការណ៍មួយ ដែលបានចេញផ្សាយកាលពីថ្ងៃសៅរ៍ថា “ការវាយប្រហារនេះ មិនមែនជាលើកចុងក្រោយនោះទេ”។

គួរបញ្ជាក់ថា ISIS-K គឺជាក្រុមប្រព្រឹត្តអំពើឃោឃៅនិងហិង្សាបំផុត ក្នុងចំណោមក្រុមសកម្មប្រយុទ្ធជីហាដទាំងអស់នៅក្នុងប្រទេសអាហ្វហ្គានីស្ថាន។

ពួកគេមានការខ្វែងគំនិតគ្នាជាមួយក្រុមតាលីបង់ ដោយចោទប្រកាន់ពួកគេថាបានបោះបង់ចោលពួកជីហាដនិងសមរភូមិ ហើយងាកទៅរកការចរចាសន្តិភាពនៅក្នុងសណ្ឋាគារលំដាប់ខ្ពស់នៅទីក្រុងដូហា ប្រទេសកាតាវិញ៕

ប្រែសម្រួល៖ Vann Vann

ប្រភព៖ BBC

ចុចអាន៖ ពីតំណែងរដ្ឋមន្ត្រី អាហ្វហ្គានីស្ថាន មកជាអ្នកធាក់កង់ដឹកជញ្ជូនអាហារនៅ អាល្លឺម៉ង់