ប៉ូលិសស្រីមានផ្ទៃពោះ៨ខែ ត្រូវក្រុមតាលីបង់ ប្រហារជីវិតដល់ផ្ទះ នៅចំពោះមុខស្វាមី និងកូនៗ

សាក្សីឃើញផ្ទាល់ភ្នែកបាននិយាយថា ប៉ូលិស្រីមានផ្ទៃពោះម្នាក់ ត្រូវបានក្រុមសកម្មប្រយុទ្ធតាលីបង់បាញ់សម្លាប់នៅចំពោះមុខស្វាមីនិងកូនៗរបស់នាង ក្នុងយុទ្ធនាការប្រហារជីវិតតាមផ្ទះរបស់ក្រុមតាលីបង់។

លោកស្រី Banu Negar ត្រូវបានសម្លាប់នៅផ្ទះរបស់នាងក្នុងក្រុង Firozkoh ដែលជាទីរួមខេត្ត Ghor ចំពេលមានអំពើហិង្សាកើនឡើងនៅក្នុងប្រទេសអាហ្វហ្គានីស្ថាន ក្រោមការដឹកនាំថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្រ្តីដែលធ្វើការនៅពន្ធនាគារក្នុងស្រុករូបនេះ គឺមានផ្ទៃពោះ៨ខែ នៅពេលត្រូវក្រុមតាលីបង់ប្រហារជីវិត កាលពីថ្ងៃសៅរ៍។

ទោះបីជាយ៉ាងណាក៏ដោយ ក្រុមនេះបានប្រាប់ BBC ថា ពួកគេមិនជាប់ពាក់ព័ន្ធនឹងការស្លាប់របស់នាងទេ ហើយកំពុងស៊ើបអង្កេត។

អ្នកនាំពាក្យ Zabiullah Mujaheed បាននិយាយថា “យើងដឹងអំពីហេតុការណ៍នេះ ហើយខ្ញុំសូមបញ្ជាក់ថា ក្រុមតាលីបង់មិនបានសម្លាប់នាងឡើយ ការស៊ើបអង្កេតរបស់យើងកំពុងបន្ត”។ លោកបានបន្ថែមថា ក្រុមតាលីបង់ បានប្រកាសលើកលែងទោសដល់មនុស្សដែលធ្វើការឲ្យរដ្ឋបាលមុន។

យោងតាមសាក្សី ខ្មាន់កាំភ្លើង ៣ នាក់បានមកដល់ផ្ទះ ហើយឆែកឆេរផ្ទះនោះ មុនពេលចងសមាជិកគ្រួសារហើយធ្វើសកម្មភាពសម្លាប់។

រូបភាពជាច្រើន ត្រូវបានចែកចាយតាមអ៊ីនធើណិត បង្ហាញពីជញ្ជាំងប្រឡាក់ឈាមនៅក្នុងផ្ទះនិងសាកសពរបស់នាង។

គួរបញ្ជាក់ថា រឿងនេះកើតឡើង បន្ទាប់ពីមានព័ត៌មានកាលពីដើមសប្តាហ៍មុនថា ប៉ូលិសស្រីអាហ្វហ្គានីស្ថានម្នាក់ កំពុងរត់គេចខ្លួនបន្ទាប់ពីត្រូវក្រុមតាលីបង់ វាយធ្វើបាបយ៉ាងដំណំ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ប្រយុទ្ធគ្នាទ្រង់ទ្រាយធំ ចលនាតស៊ូអាហ្វហ្គានីស្ថាន ចាប់បានយុទ្ធជនតាលីបង់ រាប់រយនាក់