សហរដ្ឋអាមេរិក ប្រកាសបរិច្ចាគវ៉ាក់សាំងកូវីដជាប្រវត្តិសាស្រ្ត ជូនពិភពលោក

ប្រធានាធិបតីអាមេរិកលោក ចូ បៃដិន បានថ្លែងសុន្ទរកថា ក្នុងកិច្ចប្រជុំកំពូលកូវីដ-១៩ របស់មេដឹកនាំពិភពលោកកាលពីថ្ងៃពុធទី ២២ ខែកញ្ញា ដោយសន្យាថា នឹងបរិច្ចាគវ៉ាក់សាំងជាប្រវត្តិសាស្ត្រ ចំនួន ៥០០ លានដូសបន្ថែមទៀត ដល់ប្រទេសដែលកំពុងតស៊ូដើម្បីយកឈ្នះជំងឺរាតត្បាតនេះ។

លោក បៃដិន បាននិយាយថា “នេះគឺជាវិបត្តិដែលគ្រប់គ្នាត្រូវចូលរួមជួយ។ អាមេរិកនឹងក្លាយជាឃ្លាំងសម្រាប់ចាក់វ៉ាក់សាំង ដូចដែលយើងជាឃ្លាំង សម្រាប់លទ្ធិប្រជាធិបតេយ្យក្នុងសង្គ្រាមលោកលើកទី២”។

ការសន្យាពីលោក បៃដិន នៅឯកិច្ចប្រជុំកំពូលដែលធ្វើឡើងតាមអនឡាញពីសេតវិមាន បាននាំឲ្យការប្តេជ្ញាចិត្តសរុបរបស់សហរដ្ឋអាមេរិកក្នុងការផ្តល់វ៉ាក់សាំងកូវីដ កើនដល់ ១.១ ពាន់លានដូស ច្រើនជាងគេបំផុត បើបូកសរុបការជួយរួមគ្នាពីប្រទេសនានាលើពិភពលោកទាំងមូល។

លោក បៃដិន និយាយថា “យើងបានបញ្ជូនវ៉ាក់សាំង ១៦០លានដូសទៅប្រទេសចំនួន ១០០ រួចមកហើយ។ ចំពោះរាល់ការចាក់វ៉ាក់សាំងដែលយើងបានចាត់ចែងរហូតមកដល់បច្ចុប្បន្ននៅអាមេរិក ឥឡូវនេះយើងបានប្តេជ្ញាថានឹងផ្តល់ការចាក់ ៣ ដូសទៅឲ្យពិភពលោកទាំងមូល”។

គួរបញ្ជាក់ថា វ៉ាក់សាំងថ្មីចំនួនកន្លះពាន់លានដូសនឹងបានមកពីក្រុមហ៊ុន Pfizer ហើយនឹងទៅដល់ប្រទេសដែលមានចំណូលទាបនិងមធ្យម៕

ប្រែសម្រួល៖ Vann Vann

ប្រភព៖ CNA