មេក្រុម អាល់កៃដា ម្នាក់ទៀត ត្រូវស្លាប់ក្រោមការវាយប្រហារតាមអាកាស របស់ អាមេរិក

ទីបញ្ជាការកណ្តាលរបស់សហរដ្ឋអាមេរិក (CENTCOM) បាននិយាយកាលពីថ្ងៃសុក្រថា ការវាយប្រហារតាមអាកាសមួយទៀតរបស់សហរដ្ឋអាមេរិកបានសម្លាប់មេបញ្ជាការជាន់ខ្ពស់ក្រុមអាល់កៃដាម្នាក់នៅក្នុងទីក្រុង Suluk របស់ខេត្ត Raqqa ភាគខាងជើងនៃប្រទេសស៊ីរី ។

អ្នកនាំពាក្យ CENTCOM លោក Maj. Rigsbee បាននិយាយនៅក្នុងការចេញផ្សាយកាលពីថ្ងៃសុក្រថា “ការវាយប្រហារតាមអាកាសដោយយន្តហោះដ្រូន MQ-9 Reaper របស់អាមេរិកនៅភាគពាយព្យប្រទេសស៊ីរី បានសម្លាប់មេដឹកនាំជាន់ខ្ពស់ក្រុមអាល់កៃដាលោក Abdul Hamid al-Matar ហើយយើងសូមចង្អុលបង្ហាញថា មិនមានជនស៊ីវិលរងគ្រោះក្នុងការវាយប្រហារនោះទេ” ។

ក្នុងរយៈពេលប៉ុន្មានសប្តាហ៍ចុងក្រោយនេះ អាមេរិកបានធ្វើការវាយប្រហារជាច្រើនផ្សេងទៀតប្រឆាំងក្រុមសម្ព័ន្ធមិត្តអាល់កៃដានៅក្នុងប្រទេសស៊ីរី បន្ទាប់ពីសេចក្តីថ្លែងការណ៍របស់លោក ចូ បៃដិន កាលពីខែសីហាដែលបានគូសបញ្ជាក់ពីដំណាក់កាលបន្ទាប់នៃសង្គ្រាមអាមេរិកប្រឆាំងភេរវកម្ម ។

លោក បៃដិន បាននិយាយថា “សព្វថ្ងៃនេះការគំរាមកំហែងភេរវករបានរីករាលដាលយ៉ាងធំធេងហួសពីការស្មាន ដូចជាក្រុម al-Shabaab នៅប្រទេសសូម៉ាលី, ក្រុមអាល់កៃដានៅឧបទ្វីបអារ៉ាប់ (AQQP), ក្រុម al-Nusra នៅស៊ីរី, ក្រុម ISIS ព្យាយាមបង្កើតការិយាល័យព្រះចៅកាលីហ្វាតនៅស៊ីរី និងអ៊ីរ៉ាក់ ក៏ដូចជាបង្កើតសាខានៅក្នុងប្រទេសជាច្រើននៅទ្វីបអាហ្វ្រិក និងអាស៊ីជាដើម ។

លោកបន្ថែមថា “ការគំរាមកំហែងទាំងនេះធានាការយកចិត្តទុកដាក់ និងធនធានរបស់យើង ។ យើងអនុវត្តបេសកកម្មប្រឆាំងភេរវកម្មប្រកបដោយប្រសិទ្ធភាពប្រឆាំងនឹងក្រុមភេរវករនៅក្នុងប្រទេសជាច្រើន ដែលយើងមិនមានវត្តមានយោធាអចិន្ត្រៃយ៍ ។ បើចាំបាច់យើងនឹងធ្វើដូចគ្នានៅអាហ្វហ្គានីស្ថាន ។ យើងបានបង្កើតសមត្ថភាពប្រឆាំងភេរវកម្ម ដែលនឹងអនុញ្ញាតឲ្យយើងរក្សាការឃ្លាំមើលរបស់យើងយ៉ាងម៉ឺងម៉ាត់លើការគំរាមកំហែងដោយផ្ទាល់ ចំពោះសហរដ្ឋអាមេរិកនៅក្នុងតំបន់ ហើយធ្វើសកម្មភាពយ៉ាងឆាប់រហ័ស និងសម្រេចបានប្រសិនបើចាំបាច់” ៕

ប្រែសម្រួលដោយ ៖ ជិវ័ន្ត

ប្រភព ៖ Sputnik

ចុចអាន ៖ ចិន ចោទ អាមេរិក ថា ឧប្បត្តិហេតុនាវាមុជទឹកនុយក្លេអ៊ែរនៅ សមុទ្រចិនខាងត្បូង ជានយោបាយរបស់ ទីក្រុងវ៉ាស៊ីនតោន