ព័ត៌មានអន្ដរជាតិ

គ្រូពេទ្យម៉ាឡេស៊ីផលិតស្រោមអនាម័យប្រើបានទាំងបុរស និងស្ត្រីលើកដំបូងក្នុងលោក

បានផុស

៥ years មុន

នៅ

ថ្ងៃព្រហស្បតិ៍ ២៨ តុលា ២០២១

ដោយ

អ្នកឯកទេសរោគស្ត្រីម៉ាឡេស៊ីម្នាក់បានផលិតស្រោមអនាម័យទ្វេមុខងាដែលអាចប្រើបានទាំងបុរស និងស្ត្រី ហើយត្រូវបានផលិតពីសម្ភារៈវេជ្ជសាស្ត្រធម្មតា។

អ្នកផលិតសង្ឃឹមថា ស្រោមអនាម័យទ្វេមុខងា Wondaleaf នឹងផ្តល់ឲ្យមនុស្សអាចគ្រប់គ្រងកាន់តែល្អប្រសើរនូវសុខភាពផ្លូវភេទដោយមិនគិតពីភេទ ឬទំនោផ្លូវភេទរបស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក John Tang Ing Chinh ជាគ្រូពេទ្យឯកទេសរោគស្ត្រីនៅក្រុមហ៊ុនផ្គត់ផ្គង់វេជ្ជសាស្ត្រTwin Catalyst បាននិយាយថា ៖«ជាទូទៅ វាជាស្រោមអនាម័យធម្មតាដែលមានគម្របសារធាតុស្អិត។ វាជាស្រោមអនាម័យមានសន្ទះស្អិតជាប់នឹងប្រដាប់ភេទបុរស ឬស្ត្រីហើយគ្របដណ្តប់ពេញជិតនៅតំបន់ការពារ»។

លោកបានបញ្ជាក់ថា សន្ទះដែលមានសារធាតុស្អិតជាប់នេះមានតែម្ខាងនៃស្រោម។ មានន័យថា វាអាចប្រើបានដោយភេទណាមួយក៏បាន។

លោក Tang បានផលិតស្រោមអនាម័យនេះដោយប្រើសារធាតុ polyurethane ជាសម្ភារៈប្រើបិទរបួសថ្លាឆ្លុះដែលស្តើង បត់បែនស្រួល តែជាប់ធន់ និងមិនលេចទឹក។

លោកបាននិយាយសំដៅទៅលើសម្ភារៈដែលយកមកផលិតថា ៖«នៅពេលប្រើ ជាញឹកញាប់ យើងមិនដឹងថា មានស្រោមអនាម័យទេ»។

លោក Tang បញ្ជាក់ថា ស្រោមអនាម័យ Wondaleaf បានឆ្លងកាត់ការស្រាវជ្រាវ និងធ្វើតេស្តគ្លីនិកសាស្ត្រជាច្រើនលើកមុនពេលផលិត ហើយនឹងមានលក់តាមវេបសាយរបស់ក្រុមហ៊ុននាខែធ្នូខាងមុខ។

ក្នុងមួយប្រអប់មានស្រោម Wondaleaf ២ដែលមានតម្លៃប្រមាណជាង៣ដុល្លារអាមេរិក៕

ប្រែសម្រួល៖ វីរបុត្រ
ប្រភព៖ reuters

Related Topics:ស្រោមអនាម័យ