ដំណឹងល្អមួយទៀតសម្រាប់ពិភពលោក ថ្នាំកូវីដរបស់ក្រុមហ៊ុន Pfizer កាត់បន្ថយការចូលមន្ទីរពេទ្យ និងស្លាប់ជិត ៩០ ភាគរយ

ក្រុមហ៊ុនឱសថដ៏ធំរបស់អាមេរិក Pfizer និយាយថា ថ្នាំលេបតាមមាត់សម្រាប់ព្យាបាលជំងឺកូវីដ ១៩ របស់ខ្លួនក៏អាចកាត់បន្ថយហានិភ័យនៃការចូលសម្រាកនៅមន្ទីរពេទ្យ និងការស្លាប់ ក្នុងចំណោមអ្នកជំងឺដែលឆ្លងវីរុសនេះផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វាកើតឡើង ស្របពេលដែលក្រុមហ៊ុនកំពុងស្ថិតក្នុងដំណាក់កាលចុងក្រោយនៃការសាកល្បងព្យាបាល ដែលពាក់ព័ន្ធនឹងអ្នកជំងឺជាង ៧៧០ នាក់ដែលមានហានិភ័យនៃការវិវត្តទៅជារោគសញ្ញាធ្ងន់ធ្ងរ ។

ក្រុមហ៊ុននិយាយថា អ្នកដែលត្រូវបានផ្តល់ថ្នាំនេះបានឃើញហានិភ័យនៃការចូលមន្ទីរពេទ្យ និងការស្លាប់របស់ពួកគេធ្លាក់ចុះ ៨៩ ភាគរយ ខណៈថ្នាំ Molnupiravir របស់ក្រុមហ៊ុន Merck បានកាត់បន្ថយការចូលសម្រាកព្យាបាលនៅមន្ទីរពេទ្យ និងការស្លាប់ត្រឹមតែ ៥០ ភាគរយប៉ុណ្ណោះ ។

ប្រធានផ្នែកវិទ្យាសាស្ត្ររបស់ក្រុមហ៊ុន Pfizer លោក Mikael Dolsten បាននិយាយថា នេះគឺជាការជឿនលឿនផ្នែកវេជ្ជសាស្រ្តដ៏ធំបំផុតមួយសម្រាប់ការផលិតថ្នាំព្យាបាលកូវីដនៅក្នុងរយៈពេលដ៏យូរ ។

គួរបញ្ជាក់ថា ក្រុមហ៊ុន Pfizer កំពុងស្នើទៅរដ្ឋបាលចំណីអាហារ និងឱសថអាមេរិក (FDA) ដើម្បីអនុញ្ញាតថ្នាំរបស់ខ្លួនប្រើប្រាស់បន្ទាន់ ខណៈកាល​ពី​ខែ​មុន ក្រុមហ៊ុន​ឱសថ​អាមេរិក Merck ក៏បាន​ស្នើ​ឲ្យ​ FDA ​អនុញ្ញាតឲ្យ​ប្រើ​ថ្នាំកូវីដ Molnupiravir ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ក្រុមមនុស្សមួយប្រភេទ ហាមលេបថ្នាំ Molnupiravir ដាច់ខាត