នាំគ្នាទៅប្រមូលប្រេង ពេលរថយន្តជួបគ្រោះថ្នាក់ ស្រាប់តែផ្ទុះឆេះស្លាប់និងរបួសជិត ២០០ នាក់ (មានវីដេអូ)

មនុស្សចំនួន ៩៨ នាក់បានស្លាប់ បន្ទាប់ពីការផ្ទុះដ៏ធំមួយ នៅពេលរថយន្តដឹកប្រេងបានបុកជាមួយរថយន្តដឹកទំនិញនៅក្នុងរដ្ឋធានី Freetown នៃប្រទេស សៀរ៉ាឡេអូន ។

ប្រេងឥន្ធនៈ​បាន​ហៀរ​ចេញ​មុន​នឹងបង្កជាអគ្គិភ័យ ហើយ​ភ្លើង​បាន​ឆាបឆេះ​អ្នក​ឈរ​មើល និង​រថយន្ត​នៅ​ចំណុច​ប្រសព្វ​ដ៏មមាញឹក។

ស្របពេលជាមួយគ្នានោះដែរ មនុស្សចំនួន ៩២ នាក់ កំពុងទទួលការព្យាបាលនៅក្នុងមន្ទីរពេទ្យនិងមណ្ឌលសុខភាពជុំវិញទីក្រុង Freetown។

ការផ្ទុះនេះ ត្រូវបានគេជឿថាបានកើតឡើងនៅផ្លូវប្រសព្វមួយ ខាងក្រៅផ្សារទំនើប Choithram នៃតំបន់ជាយក្រុង Wellington ដែលមានប្រជាជនច្រើន នៅម៉ោងប្រហែល ២២:០០ (ម៉ោងក្នុងស្រុក) កាលពីថ្ងៃសុក្រ។

ទីភ្នាក់ងារគ្រប់គ្រងគ្រោះមហន្តរាយជាតិ (NDMA) របស់ប្រទេសសៀរ៉ាឡេអូន បាននិយាយថា រថយន្តទាំង២បានបុកគ្នា នៅពេលដែលរថយន្តដឹកប្រេងកំពុងចូលទៅក្នុងស្ថានីយ៍ចាក់ប្រេងនៅក្បែរនោះ។

អ្នក​បើក​បរ​ បានដឹងអំពី​ការ​លេច​ធ្លាយប្រេង​ ហើយបានចេញ​ពី​រថយន្តនិង​ ​ព្រមាន​មនុស្ស​ឲ្យ​នៅ​ឆ្ងាយ។ NDMA និយាយថា ការផ្ទុះ បានកើតឡើងនៅពេលមនុស្សព្យាយាមប្រមូលប្រេងឥន្ធនៈ។

មនុស្សជាច្រើនបានប្រញាប់ប្រញាល់ទៅប្រមូលប្រេង ជាហេតុបណ្តាលឲ្យស្ទះចរាចរណ៍។ ប៉ុន្តែមួយសន្ទុះក្រោយមក ក៏មានការផ្ទុះឡើងតែម្តង។

គួរបញ្ជាក់ថា ទីក្រុងកំពង់ផែ Freetown ដែលមានប្រជាជនជាងមួយលាននាក់ បានជួបប្រទះគ្រោះមហន្តរាយធ្ងន់ធ្ងរជាច្រើនលើក​ ក្នុងរយៈពេលប៉ុន្មានឆ្នាំថ្មីៗនេះ។

កាលពីខែមីនា មនុស្សជាង ៨០ នាក់បានរងរបួស បន្ទាប់ពីអគ្គិភ័យដ៏ធំ បានឆាបឆេះតំបន់អនាធិបតេយ្យមួយក្នុងទីក្រុងនេះ បណ្តាលឲ្យមនុស្សជាង ៥,០០០ នាក់ត្រូវផ្លាស់ទីលំនៅ។

ហើយនៅក្នុងឆ្នាំ ២០១៧ មនុស្សជាង ១,០០០ នាក់ត្រូវបានសម្លាប់ បន្ទាប់ពីភ្លៀងធ្លាក់ខ្លាំងបង្កឲ្យមានការរអិលបាក់ដី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ អគ្គិភ័យឆេះស្ថានីយប្រេងឥន្ធនៈ BVM បណ្ដាលឱ្យបុរសជាម្ចាស់ រងរបួសធ្ងន់