បុរសថៃ ប្រាប់អាការនៃការកកឈាម ធ្វើឲ្យកូនស្រីស្លាប់ ក្រោយចាក់វ៉ាក់សាំងកូវីដ

សិស្សសាលា​អាយុ១៦ឆ្នាំ​ម្នាក់​នៅ​ខេត្ត Lampang ​បាន​ស្លាប់​ដោយសារ​ការ​កក​​ស្ទះ​សរសៃឈាម​ក្នុង​សួត ​ពីរ​បី​ថ្ងៃ​បន្ទាប់​ពីចាក់វ៉ាក់សាំងបង្ការជំងឺកូវីដ-១៩ប្រភេទ Pfizer ដូសទី២​។

សំណាកត្រូវបានយកទៅធ្វើតេស្ត និងកំពុងពិនិត្យដើម្បីសម្រេចថាតើ នាងពិតជាស្លាប់ដោយសារផលរំខាននៃការចាក់វ៉ាក់សាំងមែនឬក៏អត់។

លោក Thanphit Sakunmat អាយុ៤៨ឆ្នាំ ជាឪពុករបស់ក្មេងស្រី បាននិយាយថា នៅថ្ងៃទី៦ខែតុលា កូនស្រីរបស់គាត់ បានទទួលការចាក់វ៉ាក់សាំង Pfizer ដូសទី១ក្រោមកម្មវិធីចាក់វ៉ាក់សាំងបង្ការជំងឺកូវីដ-១៩ របស់រដ្ឋាភិបាលដល់សិស្ស ហើយមិនមានផលរំខានធ្ងន់ធ្ងរទេ។

ទោះបីជាយ៉ាងណាក៏ដោយ ឪពុករបស់នាងនិយាយថា មួយថ្ងៃបន្ទាប់ពីនាងបានទទួលការចាក់វ៉ាក់សាំងដូសទី២នៅថ្ងៃទី២៧ខែតុលា នាងចាប់ផ្តើមមានអាការគ្រុនក្តៅ។

នៅថ្ងៃបន្ទាប់ នាងចេញរោគសញ្ញាផ្សេងទៀតដូចជា រាក ក្អួត ពិបាកលេប និងអស់កម្លាំង។

លោក​​បន្ត​ថា ​នៅ​ថ្ងៃ​ទី​បី ​នាងក្អួត​កាន់​តែ​ធ្ងន់ធ្ងរ ហើយ​បណ្តាលឲ្យ​ឈឺ​ពោះ​និង​អស់កម្លាំង​ខ្លាំង​។ លោក​បាន​ហៅ​រថយន្ត​សង្គ្រោះ​បន្ទាន់ ហើយ​បាន​ប្រញាប់ប្រញាល់នាំ​កូនស្រី​ទៅកាន់​មន្ទីរពេទ្យ បន្ទាប់ពី​នាង​ចាប់ផ្តើម​ពិបាក​ដកដង្ហើម​។

ក្រោយមក នាងត្រូវបានគេប្រកាសថាស្លាប់ បន្ទាប់ពីត្រូវសង្គ្រោះបន្ទាន់។ សំបុត្រមរណៈ ដែលចេញដោយមន្ទីរពេទ្យបានបង្ហាញថា នាងស្លាប់ដោយសារកកស្ទះសរសៃឈាមក្នុងសួត។

គួរបញ្ជាក់ថា គិតត្រឹមថ្ងៃទី២៤ខែតុលា ការស្លាប់ចំនួន១,២៩៦នាក់ ដែលសង្ស័យថាមានទំនាក់ទំនងជាមួយការចាក់វ៉ាក់សាំងកូវីដ ត្រូវបានកត់ត្រានិងស៊ើបអង្កេតដោយអ្នកជំនាញវេជ្ជសាស្ត្រ៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ស្លាប់ ដល់ទៅជាង ១ពាន់នាក់ ក្រោយចាក់វ៉ាក់សាំងកូវីដ នៅ ថៃ

ចុចអាន៖ ស្លាប់ ដល់ទៅជាង ១ពាន់នាក់ ក្រោយចាក់វ៉ាក់សាំងកូវីដ នៅ ថៃ