ព័ត៌មានអន្ដរជាតិ

ស្វាគមន៍ ម្ចាស់មេដាយមាសពិភពលោក អ៊ុក ស្រីមុំ មកដល់កម្ពុជាល្ងាចស្អែក

បានផុស

២ years មុន

នៅ

ថ្ងៃចន្ទ ១៥ វិច្ឆិកា ២០២១

ដោយ

ក្រុមកីឡាប៉េតង់ជម្រើសជាតិកម្ពុជាផ្នែកនារីនឹងវិលត្រឡប់មកដល់មាតុភូមិវិញវេលាម៉ោងប្រហែល៥:៣៥នាទីល្ងាច ថ្ងៃអង្គារ៍ ទី១៦ ខែវិច្ឆិកា ឆ្នាំ២០២១នេះ បន្ទាប់បញ្ចប់ភារកិច្ចចូលរួមប្រកួតជើងឯកប៉េតង់ពិភពលោកឆ្នាំ២០២១នៅប្រទេសអេស្ប៉ាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ការចូលរួមប្រកួតជើងឯកប៉េតង់ពិភពលោកឆ្នាំ២០២១នេះ កម្ពុជាបានបញ្ជូនក្រុមកីឡាការិនីទៅប្រកួត២វិញ្ញាសាគឺវិញ្ញាសាវាយយកពិន្ទុទោល និងវិញ្ញាសានារីវាយ៣ទល់៣។

ជាលទ្ធផល កម្ពុជាបានឈ្នះមេដាយមាសពិភពលោកដែលធ្វើបានសម្រេចដោយកីឡាការិនី អ៊ុក ស្រីមុំ បន្ទាប់ពីយកឈ្នះកីឡាការិនីថៃក្នុងវគ្គផ្តាច់ព្រ័ត្រ។ វិញ្ញាសាវាយយកពិន្ទុនារីទោលនេះកម្ពុជាឈ្នះបាន៥លើកជាប់គ្នាដោយគិតចាប់តាំងពីឆ្នាំ២០១៣រហូតដល់ឆ្នាំ២០២១នេះដែលកម្ពុជារៀបចំការប្រកួតរាល់ពីរឆ្នាំម្តង។

ចំណែកវិញ្ញាសានារីវាយ៣ទល់៣វិញ កម្ពុជាបានឡើងវគ្គ៨ក្រុមចុងក្រោយ បន្ទាប់ពីចាញ់ក្រុមប្រទេសទុយនេស៊ីដែលអស់ឱកាសឡើងទៅវគ្គពាក់កណ្តាលផ្តាច់ព្រ័ត្រ។ វិញ្ញាសានេះកម្ពុជាមិនធ្លាប់ឈ្នះមេដាយមាសឡើយ ប៉ុន្តែធ្លាប់ឈ្នះមេដាយសំរឹទ្ធ៣ដងគឺឆ្នាំ២០១៣ ២០១៧ និង២០១៩។

អ៊ុក ស្រីមុំ ជាកីឡាការិនីកម្ពុជាទី២ដែលបានឈ្នះមេដាយមាសពិភពលោកលើវិញ្ញាសាវាយយកពិន្ទុនារីទោលនេះ បន្ទាប់ពីវីរកីឡាការិនីកម្ពុជា កែ ឡេង ដែលបានឈ្នះ៤ដងជាប់គ្នាមុនពេលចូលនិវត្ត។

កម្ពុជាបានបញ្ជូនកីឡាការិនី៤នាក់គឺ អ៊ុក ស្រីមុំ, អ៊ុន ស្រីយ៉ា, ស៊្រាង សុរ៉ាឃីម និង ឃួន យ៉ារី ព្រមទាំងគ្រូបង្វឹក សុខ ម៉ុង ហើយក៏មានថ្នាក់ដឹកនាំសហព័ន្ធ និងមន្ត្រីក្រសួងអប់រំ យុវជន និងកីឡារួមដំណើរជាមួយផងដែរ៕

អត្ថបទ៖ វីរបុត្រ

Related Topics:កីឡាប៉េតង់