ជប៉ុន ដាក់បម្រាម មិនឲ្យជនបរទេសទាំងអស់ ចូលប្រទេស

ប្រទេសជប៉ុនបាននិយាយថា ដោយសារតែការលេចចេញនូវវីរុសកូវីដបំប្លែងថ្មី Omicron, ខ្លួននឹងរារាំងការចូលរបស់ជនបរទេសទាំងអស់មកពីជុំវិញពិភពលោក ដែលការហាមឃាត់នេះ កើតឡើងត្រឹមតែប៉ុន្មានសប្តាហ៍ប៉ុណ្ណោះ បន្ទាប់ពីបានបន្ធូរបន្ថយច្បាប់ចូលដ៏តឹងរ៉ឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនាយករដ្ឋមន្ត្រី Fumio Kishida បានប្រាប់អ្នកយកព័ត៌មានថា “យើងនឹងហាមឃាត់ការចូលថ្មីរបស់ជនបរទេសទាំងអស់មកពីជុំវិញពិភពលោក ចាប់ពីថ្ងៃទី៣០ខែវិច្ឆិកាស្អែកនេះទៅ”។

កាលពីចុងសប្តាហ៍ ប្រទេសជប៉ុនបានរឹតបន្តឹងការហាមឃាត់ ការចូលសម្រាប់អ្នកដែលមកពីអាហ្វ្រិកខាងត្បូង និងប្រទេសចំនួនប្រាំបីផ្សេងទៀតនៅក្នុងតំបន់ ដោយតម្រូវឲ្យពួកគេឆ្លងកាត់ការធ្វើចត្តាឡីស័ករយៈពេល ១០ ថ្ងៃនៅទីតាំងដែលកំណត់ដោយរដ្ឋាភិបាល។

សេចក្តីប្រកាសថ្ងៃចន្ទនេះមានន័យថា ប្រទេសជប៉ុននឹងអនុវត្តជាថ្មីនូវការគ្រប់គ្រងព្រំដែន ដែលខ្លួនបានបន្ធូរបន្ថយកាលពីដើមខែនេះសម្រាប់ភ្ញៀវធុរកិច្ចរយៈពេលខ្លី និស្សិត និងកម្មករបរទេស។

ប្រទេសជាច្រើនផ្សេងទៀត បានចាត់វិធានការដើម្បីរឹតបន្តឹងព្រំដែនរបស់ពួកគេ បន្ទាប់ពីការរកឃើញវីរុសបំប្លែងថ្មី Omicron ដែលត្រូវបានកំណត់អត្តសញ្ញាណកាលពីសប្តាហ៍មុនដោយអ្នកស្រាវជ្រាវនៅអាហ្វ្រិកខាងត្បូង។

ទោះបីជាយ៉ាងណាក៏ដោយ មកទល់ពេលនេះ គេដឹងតិចតួចណាស់អំពីមេរោគនេះ រួមទាំងថាតើវាឆ្លងខ្លាំង ងាយនឹងបង្កជាជំងឺធ្ងន់ធ្ងរ ឬអាចធន់នឹងវ៉ាក់សាំងដែរឬក៏យ៉ាងណា៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ឧបករណ៍តេស្ត PCR មួយចំនួន មិនអាចរកឃើញវីរុសបំប្លែងថ្មី Omicron ទេ