ដោយសារ Omicron ទីក្រុងឡុងដ៍ លុបចោលការប្រារព្ធពិធីចូលឆ្នាំថ្មី ហើយឲ្យប្រជាជន មើលទូរទស្សន៍នៅផ្ទះ

អភិបាលក្រុងឡុងដ៍លោក Sadiq Khan បានប្រកាសថា ការរៀបចំពិធីអបអរទទួលបុណ្យចូលឆ្នាំថ្មីនៅទីលាន Trafalgar នឹងមិនត្រូវបានប្រារព្ធឡើងនោះទេ “ដើម្បីសុវត្ថិភាពសាធារណៈ” ហើយបានជំរុញឲ្យប្រជាជនចំណាយពេលថ្ងៃឈប់សម្រាកនេះមើលទូរទស្សន៍នៅផ្ទះ ។

លោក Khan បាននិយាយថា “នេះនឹងក្លាយជាការខកចិត្តយ៉ាងខ្លាំងសម្រាប់អ្នកទីក្រុងឡុងដ៍ជាច្រើន ប៉ុន្តែយើងត្រូវតែចាត់វិធានការត្រឹមត្រូវដើម្បីកាត់បន្ថយការរីករាលដាលកូវីដ ក៏ដូចជាវីរុសបំប្លែងខ្លួន Omicron” ។

យោងតាមលោក Khan បានឲ្យដឹងថា ករណីឆ្លងថ្មីនៃវីរុសកូវីដ ១៩ ចំនួន ៦៥,៥០០ ករណីត្រូវបានចុះបញ្ជីនៅទីក្រុងឡុងដ៍កាលពីសប្តាហ៍មុន ដែលបណ្តាលឲ្យមានករណីចូលសម្រាកព្យាបាលនៅមន្ទីរពេទ្យកើនឡើង ២៩ ភាគរយ ។

គួរបញ្ជាក់ថា ការសម្រេចចិត្តនេះត្រូវបានប្រកាស បន្ទាប់ពីអ្នកជំនាញរបស់រដ្ឋាភិបាលបានអំពាវនាវឲ្យមានការដាក់ការរឹតត្បិតកាន់តែតឹងរ៉ឹងកាលពីដើមខែនេះ ដោយនិយាយថា បើមិនដូច្នេះទេចំនួនករណីឆ្លងប្រចាំថ្ងៃថ្មីអាចឈានដល់ចន្លោះពី ៦០០,០០០ ទៅ ២ លានករណីនៅចុងខែធ្នូនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ Omicron កំពុងអុកឡុកប្រទេសមួយទៀតនៅ អឺរ៉ុប ដូចផ្លេកបន្ទោរ