កត្តា​ពីរ​ធ្វើ​ឲ្យ​ព្រលាន​យន្តហោះអាមេរិក​វឹកវរ​លុប​ចោលជើង​ហោះ​ហើរ​ជាង​២ពាន់​ម្សិល​មិញ

ការធ្វើដំណើរតាមផ្លូវអាកាសនៅតែបន្តវឹកវរនៅសហរដ្ឋអាមេរិកកាលពីថ្ងៃ​អាទិត្យ​ម្សិល​មិញ​ នៅពេលអាកាសធាតុផ្នែកខ្លះអាក្រក់ខ្លាំងបូករួមទាំងវីរុសកូវីដ-១៩បំប្លែងខ្លួន Omicron រាតត្បាត។

គិតទូទាំងពិភពលោកកាលពីថ្ងៃម្សិលមិញ ជើងហោះហើរជាង៤៥២៩ត្រូវបានលុបចោល ក្នុងនោះជាងពាក់កណ្តាលនៅសហរដ្ឋអាមេរិកដែលការលុបចោលជើងហោះហើរយ៉ាងច្រើននេះចំពេលវេលាធ្វើដំណើរឡើងខ្ពស់បំផុតប្រចាំឆ្នាំពោលគឺថ្ងៃឈប់សម្រាកឆ្លងឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមវេបសាយ FlightAware បង្ហាញថា សហរដ្ឋអាមេរិកបានលុបចោលជើងហោះហើរ២៦០៤ កាលពីល្ងាចថ្ងៃអាទិត្យ។ ជាមួយគ្នានេះ ជើងហោះហើរក្នុងស្រុក៣៤៤៧ក៏ត្រូវបានលុបចោលដែលចំនួននេះក្នុងចំណោមជើងហោះហើរក្នុងស្រុកទូទាំងពិភពលោក៧៦០២ត្រូវបានលុបចោល។

យោងតាមវេបសាយខាងលើឲ្យដឹងថា អាកាសចរណ៍អាមេរិករងប៉ះពាល់ខ្លាំងគឺភាគខាងត្បូងដែលត្រូវបានលុបចោលដល់១៣%។

នៅសហរដ្ឋអាមេរិក ព្រលានយន្តហោះនៅ Chicago បានរងផលប៉ះពាល់ខ្លាំងដោយសារអាកាសធាតុ ដែលព្យុះទឹកធ្លាក់វាយប្រហារខ្លាំងកាលពីរសៀលថ្ងៃសៅរ៍រហូតដល់យប់។

ការហោះហើរជាសកលនៅតែរងការវាយប្រហារពីវីរុសបំប្លែងខ្លួន Omicron។

អ្នកបើកយន្តហោះ បុគ្គលិក​លើយន្តហោះ និងក្រុមការងារបានអវត្តមានពីការងារ បន្ទាប់ពីឆ្លងកូវីដ-១៩ ឬទំនាក់ទំនងជាមួយអ្នកដំណើរដែលឆ្លង ហើយត្រូវបានធ្វើចត្តាឡីស័ក៕

ប្រែសម្រួល៖ វីរបុត្រ
ប្រភព៖ reuters