អតីតនាយករដ្ឋមន្ត្រី និងនាយករដ្ឋមន្ត្រី ថៃ បច្ចុប្បន្ន ជូនពរប្រជាជនក្នុង ឱកាសចូលឆ្នាំចិន

លោកស្រី យីងឡាក់ ស៊ីណាវ៉ាត្រា អតីតនាយករដ្ឋមន្ត្រីថៃបានបង្ហោះសារជូនពរប្រជាជនថៃក្នុងឱកាសបុណ្យចូលឆ្នាំចិននៅថ្ងៃទី ១ ខែកុម្ភៈ នេះថា “ថ្ងៃចូលឆ្នាំចិនឆ្នាំនេះ ខ្ញុំសូមជូនពរពុកម៉ែបងប្អូនជនរួមជាតិថៃទាំងអស់ មានសុខភាពល្អ គ្មានជំងឺឈឺថ្កាត់ មានសុខសុវត្ថិភាពល្អ មានប្រព័ន្ធភាពស៊ាំការពាររាងកាយល្អទាំងផ្លូវកាយ និងផ្លូវចិត្ត ជម្នះនូវរាល់ឧបសគ្គទាំងឡាយទាំងពួង ជួបតែសំណាងល្អ សម្បូរហូរហៀរ ជួបតែសុភមង្គល វិបុលសុខគ្រប់ប្រការ ប្រាថ្នាអ្វីៗឲ្យបានដូចក្ដីបំណង” ។

ចំណែកលោក ប្រាយុទ្ធ ចាន់អូចា ជានាយករដ្ឋមន្ត្រីបច្ចុប្បន្ន និងជារដ្ឋមន្ត្រីក្រសួងការពារជាតិក៏បានថ្លែងសារជូនពរ និងអបអរសាទរដល់បងប្អូនជនរួមជាតិថៃ និងប្រជាជនថៃកាត់ចិនទាំងអស់ក្នុងឱកាសចូលឆ្នាំចិននេះផងដែរ ។

លោក ប្រាយុទ្ធ បាននិយាយថា “សូមជូនពរអ្នកទាំងអស់គ្នាឲ្យជួបតែសេចក្តីសុខ សេចក្តីចម្រើន និងសុខភាពល្អ” ។ ហើយលោកក៏សូមរំលឹកផងដែរថា ប្រទេសថៃនៅតែស្ថិតក្នុងដំណាក់កាលនៃការរីករាលដាលជំងឺកូវីដ ១៩ នៅឡើយ ខណៈពេលនេះយើងត្រូវតែតាមដានយ៉ាងយកចិត្តទុកដាក់ ជាពិសេសក្នុងពិធីបុណ្យទានផ្សេងៗ ។

ជាចុងក្រោយលោកបញ្ជាក់ថា យើងត្រូវពាក់ម៉ាស រក្សាគម្លាតសង្គម លាងដៃនឹងសាប៊ូឲ្យបានញឹកញាប់ និងធ្វើតេស្តរហ័សរកកូវីដនៅមុន និងក្រោយការប្រមូលផ្ដុំ ឬការជួបជុំជាលក្ខណៈគ្រួសារជាដើម ហើយកុំភ្លេចប្រុងប្រយ័ត្នពេលញ៉ាំអាហារជាមួយគ្នា ៕

ប្រែសម្រួលដោយ ៖ ជីវ័ន្ត

ប្រភព ៖ Post Today .

ចុចអាន ៖ វីដេអូស្ដែងៗ បុរស ថៃ លលេងជាមួយពស់វែក ១០ គីឡូក្រាម ប៊ិះភ្នាត់ស្នៀត